செஞ்சி அருகே விவசாயி வீட்டில் ரூ.4 லட்சம் நகை, பணம் கொள்ளை

செஞ்சி,

செஞ்சி அருகே உள்ள அனந்தபுரம் பனமலைபேட்டையை சேர்ந்தவர் ராதாகிருஷ்ணன். விவசாயி. இவரது மனைவி நாவம்மாள். இவரது மகன் மயூரநாதன். நேற்று முன்தினம் காலையில் நாவம்மமள், மயூரநாதன் ஆகியோர் வீட்டை பூட்டிவிட்டு தங்களது நிலத்துக்கு சென்றனர். இந்நிலையில் மதியம் இவர்களது வீட்டு கதவு திறந்த நிலையில் கிடந்தது. இதை பார்த்த அப்பகுதி மக்கள், நாவம்மாளுக்கு தெரியப்படுத்தினர். இதையடுத்து அவர் தனது வீட்டுக்கு விரைந்து வந்தார்.

அப்போது வீட்டின் கதவு உடைந்த நிலையில் காணப்பட்டது. இதை பார்த்து அதிர்ச்சியடைந்த அவர், வீட்டின் உள்ளே சென்று பார்த்தார். அப்போது, அங்கிருந்த பீரோ உடைக்கப்பட்டு அதில் இருந்த பொருட்கள் அனைத்தும் சிதறி கிடந்தன. மேலும் பீரோவில் இருந்த 15½ பவுன் நகை மற்றும் ரூ. ஒரு லட்சம் ஆகியவற்றை மர்ம மனிதர்கள் கொள்ளையடித்து சென்று இருப்பது தெரியவந்தது.

இதுகுறித்து அவர் உடனடியாக அனந்தபுரம் போலீசுக்கு தகவல் தெரிவித்தார். அதன்பேரில் போலீசார் சம்பவ இடத்துக்கு சென்று விசாரணை நடத்தினர். கொள்ளை போன நகை, பணத்தின் மதிப்பு ரூ.4 லட்சம் இருக்கும் என்று கூறப்படுகிறது. இந்த சம்பவம் அப்பகுதியில் பரபரப்பை ஏற்படுத்தி இருக்கிறது. இதுகுறித்து போலீசார் வழக்குப்பதிவு செய்து, மர்ம மனிதர்களை வலைவீசி தேடி வருகின்றனர்.