கியாஸ் சிலிண்டரால் அடித்து அங்கன்வாடி உதவியாளர் கொலை கணவர் கைது

தூத்துக்குடி,

தூத்துக்குடி அருகே உள்ள அந்தோணியார்புரம் மேலத்தெருவை சேர்ந்தவர் ஸ்டீபன் விஜயபால் (வயது 37) கூலி தொழிலாளி. இவருடைய மனைவி மரியசிலுவை மேரி (33). இவர் கடந்த மாதம் அந்தோணியார்புரத்தில் உள்ள அங்கன்வாடியில் உதவியாளராக பணியில் சேர்ந்தார்.நேற்று முன்தினம் இரவு வீட்டுக்கு வந்த ஸ்டீபன் விஜயபால் மனைவியுடன் தகராறு செய்ததாக கூறப்படுகிறது. அதன்பிறகு மரியசிலுவை மேரி வீட்டுக்குள் குழந்தைகளுடன் ஒரே அறையில் தூங்கி விட்டார்.

மனைவியுடன் ஏற்பட்ட தகராறில் வீட்டுக்கு வெளியே ஸ்டீபன் விஜயபால் அமர்ந்து இருந்தார். நள்ளிரவு சுமார் 12.30 மணி ஆகியும் மனைவி மீதானகோபம் அவருக்கு தீரவில்லை. ஆத்திரம் அடைந்த அவர், வீட்டின் சமையல் அறைக்கு சென்றார்.அங்கு கியாஸ் காலியாக இருந்த சிலிண்டரை தூக்கி கொண்டு வந்தார். குழந்தைகளுடன் அயர்ந்து தூங்கிக்கொண்டிருந்த மனைவியின் தலையில் கியாஸ் சிலிண்டரால் மாறி மாறி ஓங்கி அடித்ததாக தெரிகிறது. இதில் ரத்த வெள்ளத்தில் மரியசிலுவை மேரி சம்பவ இடத்திலேயே பரிதாபமாக இறந்தார்.

தாயின் அலறல் சத்தம் கேட்டு விழித்து எழுந்த குழந்தைகள் கதறி அழுதனர். குழந்தைகளின் அழுகுரல் கேட்டு அக்கம் பக்கத்தினர் கொலை நடந்த வீட்டில் திரண்டனர். தகவல் அறிந்த புதுக்கோட்டை போலீஸ் இன்ஸ்பெக்டர் சாந்தகுமாரி மற்றும் போலீசார் சம்பவ இடத்துக்கு விரைந்து வந்தனர். மரியசிலுவை மேரியின் உடலை மீட்டு பிரேத பரிசோதனைக்காக அனுப்பி வைத்தனர்.இதுதொடர்பாக புதுக்கோட்டை போலீசார் வழக்குப்பதிவு செய்து ஸ்டீபன் விஜயபாலை கைது செய்தனர். இவர்களுக்கு ஹாஸ்டின் பாத்திமா (7), ஆரோக்கிய பிரின்சி (6), ஆரோக்கிய லின்சி(5) ஆகிய 3 பெண் குழந்தைகள் உள்ளனர். அங்கன்வாடி பெண் உதவியாளரை, கியாஸ் சிலிண்டரால் கணவரே அடித்துக் கொலை செய்தது அந்த பகுதியில் பரபரப்பை ஏற்படுத்தியது.

இந்த கொலை தொடர்பாக போலீசார் நடத்திய விசாரணையில், ஸ்டீபன் விஜயபால் சமீபகாலமாக மனநிலை பாதிக்கப்பட்டு இருந்ததாகவும், அதற்கு அவர் சிகிச்சை பெற்று வந்ததாகவும் கூறப்படுகிறது. மேலும் மதுகுடித்து விட்டு அடிக்கடி மனைவியுடன் தகராறு செய்து வந்ததாகவும் தெரிகிறது. கொலைக்கான காரணம் குறித்து கைதான ஸ்டீபன் விஜயபாலிடம் போலீசார் விசாரணை நடத்தி வருகிறார்கள்.