என்ஜினீயரிங் கல்லூரி பஸ் கவிழ்ந்தது 16 பேர் படுகாயம்

ஸ்ரீபெரும்புதூர்,

ஸ்ரீபெரும்புதூரை அடுத்த தண்டலம் பகுதியில் தனியார் என்ஜினீயரிங் கல்லூரி இயங்கி வருகிறது. பாடிச்சேரி, ஸ்ரீபெரும்புதூர் பகுதியில் உள்ள ஊழியர்களை ஏற்றி கொண்டு கல்லூரி பஸ் நேற்று காலை கல்லூரிக்கு வந்து கொண்டிருந்தது. பஸ்சில் 32 பெண்கள் உள்பட 42 பேர் இருந்தனர்.

ஸ்ரீபெரும்புதூரை அடுத்த ராமாபுரம் என்ற இடத்தில் வந்தபோது கட்டுப்பாட்டை இழந்த பஸ் நிலைதடுமாறி கவிழ்ந்தது.

இதில் பஸ்சில் இருந்த பெண்கள் உள்பட 16 பேர் படுகாயம் அடைந்தனர். அலறல் சத்தம் கேட்டு வந்த அக்கம் பக்கத்தினர் விபத்தில் சிக்கியவர்களை மீட்டனர். அவர்களுக்கு ஸ்ரீபெரும்புதூர் அரசு ஆஸ்பத்திரியில் தீவிர சிகிச்சை அளிக்கப்பட்டு வருகிறது. இது குறித்து ஸ்ரீபெரும்புதூர் போலீஸ் இன்ஸ்பெக்டர் நடராஜன் வழக்குப்பதிவு செய்து விசாரித்து வருகிறார்.