விவசாயி வீட்டில் 5 பவுன் நகை திருட்டு மேலும் 2 வீடுகளின் பூட்டும் உடைப்பு

வேட்டவலம்,

வேட்டவலத்தை அடுத்த நாடழகானந்தல் புதூரில் உள்ள நடுத்தெருவை சேர்ந்தவர் கோவிந்தசாமி (வயது 57), விவசாயி. இவரது மனைவி சகுந்தலா (45). இவர்களுக்கு தலவாய்குளம் பகுதியில் விவசாய நிலம் உள்ளது. நேற்று முன்தினம் இரவு கணவன் - மனைவி இருவரும் நிலத்திலேயே தங்கிவிட்டனர்.

வீட்டில் யாரும் இல்லாததை அறிந்த மர்ம நபர்கள், வீட்டின் முன்கதவு பூட்டை உடைத்து உள்ளே சென்று பீரோவை உடைத்து அதிலிருந்த 5 பவுன் நகைகளை திருடிச் சென்று உள்ளனர்.

அதேபோல் அதே பகுதியில் மெயின் ரோட்டில் உள்ள கண்ணுசாமி (60) என்பவர் சென்னையில் வசிப்பதால் வீட்டை பூட்டி சென்று உள்ளார். அவரது வீட்டின் பூட்டை உடைத்த மர்ம நபர்கள் உள்ளே சென்று பார்த்துள்ளனர். வீட்டில் எதுவும் இல்லாததால் ஏமாற்றத்துடன் திரும்பி சென்றுள்ளனர்.

போலீசில் புகார்

இதையடுத்து அந்த வீட்டின் பக்கத்து வீட்டில் வசிக்கும் தட்சிணாமூர்த்தி (59) என்பவரின் வீட்டின் முன்பு உள்ள இரும்பு கதவின் பூட்டை உடைத்து உள்ளனர். சத்தம் கேட்டு எழுந்த தட்சிணாமூர்த்தி யார் என்று குரல் கொடுத்த போது மர்ம நபர்கள் அங்கிருந்து தப்பி ஓடிவிட்டனர்.

இதுகுறித்து வேட்டவலம் போலீசாருக்கு தகவல் தெரிவிக்கப்பட்டது. அதன்பேரில் போலீஸ் சப்- இன்ஸ்பெக்டர்கள் முத்தையன், வீரமணி ஆகியோர் சம்பவ இடத்திற்கு வந்து விசாரணை நடத்தினர்.