2 அரசு பஸ்களை சிறை பிடித்து மறியல்

பெரியபாளையம்,

பெரியபாளையம் அருகே தண்டலத்தில் இருந்து சென்னை பாரிமுனை, அம்பத்தூர் தொழிற்பேட்டைக்கு 2 அரசு பஸ்கள் இயக்கப்பட்டு வந்தன. இந்த பஸ்கள் சரிவர இயக்கப்படவில்லை என்று கூறப்படுகிறது.

இதையடுத்து நேற்று காலை 2 அரசு பஸ்களை இந்திய ஜனநாயக வாலிபர் சங்கத்தினர், அனைத்திந்திய மாதர் சங்கம், இளைஞர் மாணவர் சங்கத்தினர் என்று ஏராளமானோர் பெரியபாளையம் அருகே தண்டலம் பஜாரில் சிறை பிடித்து மறியலில் ஈடுபட்டனர்.

இதுகுறித்து தகவல் அறிந்த பெரியபாளையம் போலீசார் சம்பவ இடத்துக்கு விரைந்து வந்து மறியலில் ஈடுபட்டவர்களிடம் பேச்சு வார்த்தை நடத்தினார்கள்.

போக்குவரத்து கிளை அலுவலர் சம்பவ இடத்திற்கு வந்து எழுத்துப்பூர்வமாக உறுதி அளித்தால் மட்டுமே போராட்டத்தை கைவிடுவோம் என்று கூறினர். போக்குவரத்து அலுவலர் வந்து உறுதி அளித்ததன்பேரில் போராட்டம் கைவிடப்பட்டது. இந்த போராட்டம் காரணமாக 1 மணி நேரம் போக்குவரத்து பாதிக்கப்பட்டது.