மாதனூர் பகுதியில் சூறாவளி காற்றுடன் பலத்த மழை

ஆம்பூர்,

வேலூர் மாவட்டத்தில் கோடை வெயில் சுட்டெரித்து வருகிறது. அனல் காற்று வீசுவதால் பொதுமக்கள் பகல் நேரங்களில் வீட்டை விட்டு வெளியே வராமல் உள்ளனர். மேலும் வாகன ஓட்டிகள் பெரும் அவதிப்படுகின்றனர். இந்த நிலையில் நேற்று முன்தினம் இரவு ஆம்பூர், மாதனூர் பகுதியில் சூறாவளி காற்றுடன் பலத்த மழை பெய்தது. தொடர்ந்து ½ மணி நேரம் பலத்த மழை பெய்ததால் தெருக்களில் மழைநீர் பெருக்கெடுத்து ஓடியது.

மாதனூர் பகுதியில் சூறாவளி காற்றுடன் ஆலங்கட்டி மழையும் பெய்தது. இதனால் மாதனூர் மற்றும் அதனை சுற்றியுள்ள பாலூர், திருமலைகுப்பம் உள்ளிட்ட கிராமங்களில் விவசாயிகள் பயிரிட்டு இருந்த வாழை மரங்கள், பப்பாளி மரங்கள் சாய்ந்து விழுந்தன. பாலூர் ஊராட்சி கீழ்புதூர் கிராமத்தை சேர்ந்த விவசாயி பலராமன், மோகன், காந்தி, வரதராஜூலு ஆகியோரின் 5 ஏக்கரில் பயிரிடப்பட்டிருந்த வாழை மரங்கள் சாய்ந்தன. குலை தள்ளி அறுப்புக்கு தயாராக இருந்த நிலையில் வாழை மரங்கள் சாய்ந்து விழுந்ததால் விவசாயிகள் வேதனை அடைந்துள்ளனர்.

அப்பகுதியில் சுமார் 30 ஏக்கருக்கும் மேற்பட்ட வாழை, பப்பாளி மரங்கள் சேதமடைந்து இருக்காலம் என கூறப்படுகிறது. மேலும் வீட்டின் மேற்கூரைகளும், கோழி பண்ணையில் இருந்த கூரைகளும் காற்றில் அடித்து செல்லப்பட்டது. மரங்களின் கிளைகள் முறிந்து விழுந்தது. மின்கம்பங்கள் அடியோடு சாய்ந்தது. இதனால் மாதனூர் பகுதியில் இரவு முழுவதும் மின்வினியோகம் துண்டிக்கப்பட்டது.

இதுகுறித்து தகவல் அறிந்ததும் வருவாய்துறையினர் சம்பவ இடத்திற்கு சென்று விசாரணை நடத்தினர்.