நேபாளம் வழியாக கடத்தப்பட்ட ரூ.2 கோடி தங்கத்துடன் 4 பேர் கைது

மும்பை,

துபாயில் இருந்து நேபாளம் வழியாக ஒரு கும்பல் ரெயிலில் அதிகளவு தங்கம் கடத்தி வருவதாக வருவாய் புலனாய்வு இயக்குனரக அதிகாரிகளுக்கு ரகசிய தகவல் கிடைத்தது.

இதையடுத்து மும்பை லோக்மான்யா திலக் (எல்.டி.டி.) டெர்மினஸ் சென்ற அதிகாரிகள் சம்பவத்தன்று பாடலிபுத்ரா எக்ஸ்பிரசில் வந்து இறங்கிய ஹபிப், சர்புதீன், மன்சூர், ஜாபர் ஆகிய 4 பேரை ரூ.2 கோடி மதிப்பிலான 7 கிலோ தங்கத்துடன் பிடித்தனர்.

அவர்களிடம் நடத்திய விசாரணையில், பிடிபட்டவர்களில் 2 பேர் துபாயில் இருந்து விமானம் மூலம் நேபாளத்திற்கு தங்கத்தை கடத்தி வந்துள்ளனர். பின்னர் அவர்கள் நேபாளத்தை சேர்ந்த 2 பேருரின் உதவியுடன் போலி ஆவணங்களை காட்டி இந்திய எல்லைக்குள் நுழைந்துள்ளனர். இதைதொடர்ந்து அவர்கள் பாட்னாவில் இருந்து மும்பைக்கு ரெயிலில் வந்தது தெரியவந்துள்ளது.

இதையடுத்து 4 பேரையும் கைது செய்த அதிகாரிகள் அவர்களிடம் தீவிர விசாரணை நடத்தி வருகின்றனர். விமானநிலையத்தில் கெடுபிடிகள் அதிகமாக இருப்பதால் கடத்தல்காரர்கள் நேபாளம் வழியாக தங்கம் கடத்தி வந்துள்ளது சுங்க அதிகாரிகள் இடையே அதிர்ச்சியை ஏற்படுத்தி உள்ளது.