தாரமங்கலம்: காலிக்குடங்களுடன் கலெக்டர் அலுவலகத்தை முற்றுகையிட்ட பொதுமக்கள்

சேலம்,

சேலம் மாவட்டம் தாரமங்கலம் ஊராட்சி ஒன்றியத்திற்கு உட்பட்ட காட்டுவளவு, சொட்டையன்காடு, மடிச்சாம்பட்டி பகுதியை சேர்ந்த 50-க்கும் மேற்பட்ட பொதுமக்கள் நேற்று காலிக்குடங்களுடன் சேலம் கலெக்டர் அலுவலகத்துக்கு திரண்டு வந்தனர். பின்னர் அவர்கள் தங்கள் பகுதிக்கு குடிநீர் வழங்க கோரி திடீரென முற்றுகையிட்டு போராட்டத்தில் ஈடுபட்டனர். இதனால் அந்த பகுதியில் பரபரப்பு ஏற்பட்டது.

இந்த போராட்டத்தில் ஈடுபட்ட பெண்கள் கூறியதாவது:- எங்கள் பகுதியில் சுமார் 200-க்கும் மேற்பட்ட குடும்பத்தினர் வசித்து வருகிறோம். இந்த பகுதியில் உள்ள வீடுகளுக்கு மேட்டூர் குடிநீர் குழாய் இணைப்பு மூலம் தண்ணீர் வினியோகம் செய்யப்பட்டு வருகிறது. ஆனால் விதிமுறைகளை மீறி சிலர் வீடுகளுக்கு தரைதொட்டி அமைத்து மேட்டூர் தண்ணீர் வரும் பிரதான குழாயில் திருட்டுத்தனமாக இணைப்பு மூலம் தண்ணீரை உறிஞ்சி கொள்கின்றனர். இதனால் எங்கள் பகுதிக்கு கடந்த சில மாதங்களாக குடிநீர் வரவில்லை. இதன் காரணமாக 1½ கிலோ மீட்டர் தூரம் சென்று குடிநீர் எடுக்க வேண்டியுள்ளது.