கோவில்பட்டியில் வீடு புகுந்து டி.வி. திருடியவர் கைது கார் பறிமுதல்

கோவில்பட்டி, 

கோவில்பட்டி இந்திரா நகரை சேர்ந்தவர் பிரமநாயகம். இவருடைய மனைவி கஸ்தூரிபாய்(வயது 60). பிரமநாயகம் இறந்து விட்டார். இவரது மகள் வெளிநாட்டில் வேலை பார்த்து வருகிறார். தனியாக வசித்து வரும் அவர், கடந்த 2 நாட்களுக்கு முன்பு வீட்டை பூட்டிவிட்டு நாகர்கோவிலுக்கு சென்றார். நேற்று அதிகாலையில் அவர் வீட்டுக்கு வந்தார். அப்போது வீட்டின் கதவு உடைக்கப்பட்டு திறந்து கிடந்தது. பதறிப்போன அவர் வீட்டிற்குள் சென்று பார்த்தபோது டி.வி. திருடப்பட்டு இருந்தது தெரியவந்தது. இதுகுறித்து அவர் கொடுத்த புகாரின் பேரில் கோவில்பட்டி மேற்கு போலீசார் விசாரணை நடத்தி வந்தனர்.

இந்த நிலையில் இனாம்மணியாச்சி பகுதியில் போலீசார் வாகன சோதனையில் இருந்த போது, அந்த வழியாக வந்த காரை வழிமறித்து சோதனை செய்தனர். அப்போது காரில் டி.வி. இருந்தது தெரியவந்தது. இதனையடுத்து அந்த காரை ஓட்டி வந்த கோவில்பட்டி சாஸ்திரி நகரை சேர்ந்த சங்கிலிபாண்டியிடம் (33) போலீசார் விசாரணை நடத்தினர். விசாரணையில் அவர் கஸ்தூரிபாய் வீட்டில் டி.வி.திருடியதை ஒப்பு கொண்டார்.

இதனையடுத்து மேற்கு போலீசார் வழக்குப்பதிவு செய்து சங்கிலிபாண்டியை கைது செய்தனர். அவரிடம் இருந்து கார், டி.வி. பறிமுதல் செய்யப்பட்டன.