விவசாயத்திற்கு மின் இணைப்பு வழங்கக்கோரி 3 விவசாயிகள் தீக்குளிக்க முயன்றதால் பரபரப்பு

கறம்பக்குடி,

புதுக்கோட்டை மாவட்டம், கறம்பக்குடி அருகே உள்ள புதுவலசல், இளைகடிவிடுதி, கருக்காகுறிச்சி உள்ளிட்ட கிராமங்களை சேர்ந்தவர்கள் பெரும்பாலானோர் விவசாயத்தையே நம்பி வாழ்ந்து வருகின்றனர். கஜா புயல் கரையை கடந்து ஒரு மாதத்திற்கு மேல் ஆகியும் இன்னும் இப்பகுதிகளுக்கு மின் இணைப்புகள் வழங்கப்படவில்லை. இதனால், புதுவயல் பகுதியில் உள்ள நெல், கரும்பு உள்ளிட்ட பயிர்கள் கருக தொடங்கி உள்ளன. இதையடுத்து அந்த பகுதியை சேர்ந்த விவசாயிகள் மற்றும் பொதுமக்கள் மின் இணைப்பு வழங்கக்கோரி மின்சார வாரிய அதிகாரிகளிடம் முறையிட்டும், இதுவரை எவ்வித நடவடிக்கையும் எடுக்கப்படவில்லை. இதனால், ஆத்திரமடைந்த விவசாயிகள் மற்றும் பொதுமக்கள் நேற்று கறம்பக்குடி-புதுக்கோட்டை சாலையில் புதுப்பட்டி மின்சார வாரிய அலுவலகம் அருகே சாலை மறியலில் ஈடுபட்டனர்.

தீக்குளிக்க முயற்சி

அப்போது சாலை மறியலில் ஈடுபட்ட 3 விவசாயிகள் மின் இணைப்பு கேட்டு, தங்களது உடலில் பெட்ரோலை ஊற்றி தீக்குளிக்க முயன்றனர். இதனால் அங்கு பரபரப்பு ஏற்பட்டது. இதைக்கண்டு அதிர்ச்சி அடைந்த மற்ற விவசாயிகள் அவர்களை தீக்குளிக்க விடாமல் தடுத்து, அவர்கள் மீது தண்ணீரை ஊற்றினார்கள்.

இதுகுறித்து தகவல் அறிந்த தாசில்தார் சக்திவேல், கறம்பக்குடி போலீஸ் இன்ஸ்பெக்டர்கள் கார்த்திகைசாமி மற்றும் போலீசார் சம்பவ இடத்துக்கு வந்து மறியலில் ஈடுபட்டவர்களிடம் பேச்சுவார்த்தை நடத்தினார்கள். இதில் உடன்பாடு ஏற்பட்டதையடுத்து மறியலில் ஈடுபட்டவர்கள் போராட்டத்தை கைவிட்டு கலைந்து சென்றனர்.