மீன்பிடித்து கொண்டிருந்த போது குட்டையில் தவறி விழுந்து மீனவர் சாவு போலீசார் விசாரணை

வேதாரண்யம்,

நாகை மாவட்டம் வேதாரண்யம் தாலுகா வேட்டைக்காரனிருப்பு போலீஸ் சரகம், புதுப்பள்ளி கிராமத்தை சேர்ந்தவர் முருகையன்(வயது58). மீனவர் சம்பவத்தன்று இவர் அந்த ஊரில் உள்ள ஒரு குட்டையில் மீன்பிடித்துக் கொண்டிருந்தார். அப்போது அவர் எதிர்பாராதவிதமாக குட்டையில் தவறி விழுந்து உயிரிழந்துள்ளார்.

இந்த நிலையில் மீன்பிடிக்க சென்ற முருகையனை காணாததால் அவருடைய உறவினர்கள் பல்வேறு இடங்களில் தேடிய போது குட்டையில் அவர் பிணமாக மிதந்ததை கண்டு அதிர்ச்சி அடைந்தனர்.

இதுகுறித்து தகவல் அறிந்த வேட்டைக்காரனிருப்பு போலீஸ் சப்-இன்ஸ்பெக்டர் பசுபதி மற்றும் போலீசார் சம்பவ இடத்துக்கு வந்து முருகையன் உடலை கைப்பற்றி பிரேத பரிசோதனைக்காக நாகை அரசு மருத்துவமனைக்கு அனுப்பி வைத்தனர்.

மேலும், இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர். இறந்த முருகையனுக்கு சரோஜா என்ற மனைவியும், இரண்டு மகன்களும், ஒரு மகளும் உள்ளனர்.