ரத்தவங்கி பணிகளில் உரிய கல்வித்தகுதி இல்லாதவர்களை நியமித்தது எப்படி? தமிழக அரசுக்கு ஐகோர்ட்டு கேள்வி

மதுரை,

மதுரை அண்ணாநகரைச் சேர்ந்த வக்கீல் முத்துக்குமார், மதுரை ஐகோர்ட்டில் தாக்கல் செய்த மனுவில் கூறி இருப்பதாவது:–

தமிழ்நாடு மாநில எய்ட்ஸ் கட்டுப்பாட்டு மையம் எய்ட்ஸ் பரவுவதை தடுத்தல், விழிப்புணர்வை ஏற்படுத்துதல், எய்ட்ஸ் நோயால் பாதிக்கப்பட்டவர்களுக்கு தகுந்த சிகிச்சை அளித்தல், ஆலோசனை மற்றும் மறுவாழ்வு வழங்குதல் போன்ற பணிகளை செய்ய வேண்டும். இதற்காக எய்ட்ஸ் கட்டுப்பாட்டு மையத்துக்கு பல கோடி ரூபாய் நிதி ஒதுக்கப்படுகிறது. ஆனால் இந்த பணிகளை எய்ட்ஸ் கட்டுப்பாட்டு மையம் முறையாக மேற்கொள்வது இல்லை.

விருதுநகர் மாவட்டத்தில் பள்ளி சிறுமிகள் 2 பேருக்கு எச்.ஐ.வி. தொற்று இருப்பது சமீபத்தில் கண்டுபிடிக்கப்பட்டது. சிவகங்கையில் ஒரு சிறுமிக்கு எச்.ஐ.வி. கிருமியுடன் ரத்தம் செலுத்தப்பட்டது. இப்போது சாத்தூர் கர்ப்பிணிக்கு எச்.ஐ.வி. கிருமியுடன் ரத்தத்தை செலுத்தி உள்ளனர். இதன்மூலம் ரத்த வங்கிகள் முறையாக கண்காணிக்கப்படுவது இல்லை என்பது தெளிவாகிறது. தமிழகத்தில் பல்வேறு அரசு மற்றும் தனியார் ரத்த வங்கிகள் உரிமங்களை புதுப்பிக்காமல் சட்டவிரோதமாக இயங்கி வருகின்றன.

இந்த ரத்த வங்கிகளில் உரிய கல்வித்தகுதி இல்லாத ஒப்பந்த பணியாளர்கள்தான் உள்ளனர். இதனால் ரத்தம் தேவைப்படும் ஏழை மக்கள் பாதிக்கப்படுகின்றனர். தானமாக பெறப்படும் ரத்தம் மருத்துவ துறையினரின் அலட்சியத்தாலும், அதிகாரிகளின் கவனக்குறைவாலும் வீணடிக்கப்பட்டு உள்ளது. தவறான முறையில் ரத்தம் செலுத்தப்பட்டதால் பலருக்கு எச்.ஐ.வி. கிருமி பரவியுள்ளது.

இதனால் தமிழகத்தில் உள்ள அனைத்து அரசு மற்றும் தனியார் ஆஸ்பத்திரி ரத்த வங்கிகளை கண்காணிக்கவும், ரத்தம் கொடுப்பவர்கள், பெறுபவர்களின் விவரங்களை தொடர்ந்து பராமரிக்கவும், உரிய கல்வித்தகுதி இல்லாத பணியாளர்களை நீக்கவும், பாதிக்கப்பட்டவர்களுக்கு இழப்பீடு மற்றும் வேலைவாய்ப்பு வழங்கவும் உத்தரவிட வேண்டும்.

இவ்வாறு மனுவில் கூறியிருந்தார்

இந்த வழக்கு நீதிபதிகள் சுப்பையா, புகழேந்தி முன்பு நேற்று விசாரணைக்கு வந்தது. அப்போது மனுதாரர் தரப்பில் வக்கீல்கள் நீலமேகம், முகமது ரஸ்வி ஆஜராகி, “ரத்த வங்கிகள் மற்றும் எய்ட்ஸ் கட்டுப்பாட்டு மையங்களில் பணியாற்றும் பலர் உரிய கல்வித்தகுதி இன்றி பணியாற்றி வருகின்றனர். உதாரணமாக, மதுரை அரசு ராஜாஜி ஆஸ்பத்திரியில் உள்ள மாவட்ட எய்ட்ஸ் கட்டுப்பாட்டு மையத்தில் எம்.பி.பி.எஸ். படித்தவருக்கு பதிலாக எம்.ஏ. பொருளாதாரம் படித்தவர்தான் பணியாற்றி வருகிறார். எனவே இதுபோன்ற பணியிடங்களுக்கு தகுதியான நபர்களை நியமிக்க உத்தரவிட வேண்டும்“ என்று வாதாடினார்.

விசாரணை முடிவில், உயிர் பாதுகாப்பு தொடர்பான ரத்தவங்கி பணிகளில் உரிய கல்வித்தகுதி இல்லாதவர்களை நியமித்தது எப்படி? என நீதிபதிகள் கேள்வி எழுப்பினர். பின்னர் இதுதொடர்பாக தமிழக அரசிடம் உரிய விளக்கம் பெற்று தெரிவிக்க வேண்டும் என்று அரசு வக்கீலுக்கு நீதிபதிகள் உத்தரவிட்டு, விசாரணையை வருகிற 8–ந்தேதிக்கு ஒத்திவைத்தனர்.