சேடபட்டி அருகே மின்கம்பத்தில் மோட்டார் சைக்கிள் மோதி 2 தொழிலாளிகள் பலி

சேடபட்டி,

மதுரை மாவட்டம் சேடபட்டி அருகே உள்ள குப்பல் நத்தம் கிராமத்தை சேர்ந்தவர்கள் முத்துப்பாண்டி (வயது 40), சேகர் (40). இவர்கள் இருவரும் கூலி வேலை செய்து வந்தனர்.

இந்த நிலையில் அவர்கள் இருவரும் குப்பல் நத்தத்தில் இருந்து, மங்கல்ரேவுக்கு மோட்டார் சைக்கிளில் சென்றனர். முத்துப்பாண்டி மோட்டார் சைக்கிளை ஓட்டினார்.

உசிலம்பட்டி– பேரையூர் சாலையில் மங்கல்ரேவு அருகே அவர்கள் சென்றபோது சாலை ஓரத்தில் உள்ள மின்கம்பத்தின் மீது எதிர்பாராதவிதமாக மோட்டார் சைக்கிள் பயங்கரமாக மோதியது. இந்த விபத்தில் முத்துப்பாண்டியும், சேகரும் தூக்கி வீசப்பட்டனர். பலத்த காயம் அடைந்த அவர்கள் 2 பேரும் சம்பவ இடத்திலேயே பரிதாபமாக இறந்தனர்.

இந்த விபத்து குறித்து தகவல் அறிந்ததும் சேடபட்டி போலீஸ் இன்ஸ்பெக்டர் செல்வகுமாரி மற்றும் போலீசார் சம்பவ இடத்துக்கு விரைந்து வந்து விசாரணை நடத்தினார்கள். பலியான 2 பேரின் உடல்கள் பிரேத பரிசோதனைக்காக அரசு ஆஸ்பத்திரிக்கு அனுப்பி வைக்கப்பட்டன. இந்த விபத்து தொடர்பாக சேடபட்டி போலீசார் வழக்குப்பதிவு செய்து விசாரணை நடத்தி வருகின்றனர்.