பொங்கல் பண்டிகையையொட்டி தொடர் விடுமுறை: சுண்ணாம்பாறு படகு குழாமில் சுற்றுலா பயணிகள் குவிந்தனர்

அரியாங்குப்பம்,

தமிழர் திருநாளான பொங்கல் பண்டிகை 15–ந் தேதி மிகவும் உற்சாகமாக கொண்டாடப்படுகிறது. இந்த பண்டிகையையொட்டி 13–ந் தேதி ஞாயிற்றுக்கிழமை வழக்கமான விடுமுறை நாள், 14–ந் தேதி போகிப் பண்டிகை விடுமுறை தினம், 15–ந் தேதி பொங்கல் பண்டிகை, 16–ந் தேதி மாட்டுப் பொங்கல் விழா, 17–ந் தேதி திருவள்ளுவர் தினம் என மொத்தம் 5 நாட்கள் விடுமுறை நாளாக அமைந்துள்ளது.

இந்த தொடர் விடுமுறையை உற்சாகமாக அனுபவித்து மகிழ புதுச்சேரிக்கு ஏராளமான சுற்றுலாப் பயணிகள் வந்து குவிந்துள்ளனர். குறிப்பாக அனைவரையும் கவரும் சுற்றுலா இடமாக திகழும் சுண்ணாம்பாறு படகு குழாமில் நேற்று முன்தினம் ஆயிரக்கணக்கான சுற்றுலா பயணிகள் வந்து குவிந்தனர். அவர்கள் நீண்ட வரிசையில் காத்திருந்து படகு பயணத்துக்கான டிக்கெட் எடுத்து படகு பயணம் மேற்கொண்டனர்.

நேற்றும் 2–வது நாளாக சுற்றுலா பயணிகளின் கூட்டத்தால் சுண்ணாம்பாறு படகு குழாம் திணறியது. பயணிகளின் வருகைக்கு ஏற்பட படகுகள் இல்லாததால் பயணிகள் நீண்ட நேரம் காத்திருந்த பின்னரே படகு சவாரி செய்து மகிழ முடிந்தது.

அதேபோல் புதுச்சேரி கடற்கரை, மணக்குள விநாயகர் கோவில் அரவிந்தர் ஆசிரமம் ஆகியவற்றுக்கும் சுற்றுலா பயணிகள் அதிக அளவில் வந்து சென்றனர்.

அதன் காரணமாக புதுச்சேரி நகரில் வணிக முக்கியத்துவம் வாய்ந்த நேரு வீதி, காந்தி வீதி, அண்ணாசாலை உள்பட அனைத்து பிரதான வீதிகளிலும் போக்குவரத்து நெரிசல் ஏற்பட்டது. ஆங்காங்கே போக்குவரத்து போலீசார் நின்று போக்குவரத்தை சீர்செய்தாலும் மீண்டும், மீண்டும் போக்குவரத்து நெரிசல் ஏற்பட்டது.