பாபநாசம் அருகே பரிதாபம்: ரெயிலில் அடிபட்டு தொழிலாளி பலி

பாபநாசம்,

தஞ்சை மாவட்டம் பாபநாசம் அருகே உள்ள பண்டாரவாடை பார்வதிபுரம் அந்தோணியார் கோவில் தெருவை சேர்ந்தவர் ஆரோக்கியதாஸ் (வயது32). தொழிலாளி. இவருடைய மனைவி கற்பகமேரி (31). இவர்களுக்கு கடந்த ஆண்டு (2018) ஜூன் மாதம் 4-ந் தேதி திருமணம் நடந்தது.

தற்போது 8 மாத கர்ப்பிணியாக உள்ளார். இந்த நிலையில் நேற்று முன்தினம் இரவு ஆரோக்கியதாஸ், பண்டாரவாடை பகுதியில் உள்ள தண்டவாளத்தை கடக்க முயன்றார்.

அப்போது எதிர்பாராதவிதமாக அந்த வழியாக வந்த ரெயில் ஆரோக்கியதாஸ் மீது மோதியது. இதில் சம்பவ இடத்திலேயே அவர் இறந்தார். இதுகுறித்து தகவல் அறிந்த தஞ்சை ரெயில்வே போலீஸ் இன்ஸ்பெக்டர் சாந்தி, சிறப்பு சப்-இன்ஸ்பெக்டர் பாஸ்கரன், ஏட்டு குணசேகரன் மற்றும் போலீசார் அங்கு சென்று ஆரோக்கியதாசின் உடலை கைப்பற்றி பிரேத பரிசோதனைக்காக பாபநாசம் அரசு மருத்துவமனைக்கு அனுப்பி வைத்தனர்.

மேலும் இதுதொடர்பாக ரெயில்வே போலீசார் வழக்குப்பதிவு செய்து விசாரணை நடத்தி வருகிறார்கள். ரெயிலில் அடிபட்டு தொழிலாளி ஒருவர் இறந்த சம்பவம் அப்பகுதி மக்களிடையே பரிதாபத்தை ஏற்படுத்தி உள்ளது.