குலசேகரம் விடுதியில் வேன் டிரைவர் மர்ம சாவு போலீசார் விசாரணை

குலசேகரம்,

குலசேகரம் அருகே பிணந்தோடு பகுதியை சேர்ந்தவர் சந்தோஷ் (வயது 40). இவருக்கு திருமணம் முடிந்து பிரியா என்ற மனைவியும், ஒரு மகளும் உள்ளனர்.

சந்தோஷ் அப்பகுதியில் உள்ள தனியார் பள்ளியில் வேன் டிரைவராக பணியாற்றி வந்தார். மேலும், வாகனங்களை வாங்கி விற்கும் தொழிலும் செய்து வந்தார்.

இந்தநிலையில் நேற்று முன்தினம் இரவு குலசேகரம் பகுதியில் உள்ள ஒரு தனியார் தங்கும் விடுதியில் சந்தோஷ் அறை எடுத்து தங்கினார். நேற்று காலை வெகுநேரம் ஆகியும் அவர் தங்கியிருந்த அறை கதவு திறக்கப்படவில்லை. இதனால் சந்தேகமடைந்த விடுதி ஊழியர்கள், இதுபற்றி குலசேகரம் போலீசாருக்கு தகவல் தெரிவித்தனர்.

தகவல் அறிந்த போலீசார் சம்பவ இடத்துக்கு விரைந்து வந்து அறையின் கதவை உடைத்து உள்ளே சென்று பார்த்தனர். அப்போது, அங்கு சந்தோஷ் தூக்கில் பிணமாக தொங்குவதை கண்டு அதிர்ச்சி அடைந்தனர். பின்னர், அவரது பிணத்தை கைப்பற்றி பிரேத பரிசோதனைக்காக குலசேகரம் அரசு ஆஸ்பத்திரிக்கு அனுப்பி வைத்தனர்.

மேலும், இதுபற்றி சந்தோசின் மனைவி மற்றும் உறவினர்களுக்கு தகவல் தெரிவிக்கப்பட்டது. தகவல் அறிந்து வந்த மனைவி பிரியா சந்தோசின் உடலை பார்த்து கதறி அழுதார். பின்னர் அவர், குலசேகரம் போலீசில் ஒரு புகார் மனு அளித்தார். அதில் தனது கணவரின் சாவில் சந்தேகம் இருப்பதாக கூறியுள்ளார். அதன்பேரில் போலீசார் வழக்குப்பதிவு செய்து, சந்தோஷ் மர்ம சாவு குறித்து விசாரணை நடத்தி வருகிறார்கள்.