பரிசோதிக்காத ரத்தம் ஏற்றியதால் எச்.ஐ.வி. பாதிப்பு: கைக்குழந்தையுடன் ஆஜரான சாத்தூர் பெண்ணிடம் தனி அறையில் நீதிபதிகள் விசாரணை இழப்பீடு, வேலை வழங்குவது குறித்து அரசுக்கு அதிரடி உத்தரவு

மதுரை,

மதுரையை சேர்ந்த வக்கீல்கள் எஸ்.முத்துக்குமார், அப்பாஸ் மந்திரி ஆகியோர் மதுரை ஐகோர்ட்டில் தனித்தனியாக தாக்கல் செய்த மனுவில் கூறியிருந்ததாவது:–

விருதுநகர் மாவட்டம் சாத்தூரை சேர்ந்த கர்ப்பிணி ஒருவருக்கு, கடந்த சில மாதங்களுக்கு முன்பு எச்.ஐ.வி. தொற்றுடன் இருந்த ரத்தம் செலுத்தப்பட்ட விவகாரம் பெரும் அதிர்ச்சியை ஏற்படுத்தியது. அரசு ரத்த வங்கி பணியாளர்கள், அரசு டாக்டர்களின் கவனக்குறைவால் தான் கர்ப்பிணிக்கு எச்.ஐ.வி. ரத்தம் செலுத்தப்பட்டுள்ளது. இதற்கு பணியாளர் பற்றாக்குறையும் காரணம்.

எனவே அரசு மற்றும் தனியார் ரத்த வங்கிகளில் உரிய கல்வித்தகுதி உடையவர்களை நியமிக்க வேண்டும். எச்.ஐ.வி. பாதித்த பெண்ணுக்கு உரிய இழப்பீடு மற்றும் சிகிச்சை வழங்கவும், தானமாக பெறப்படும் ரத்தத்தை பாதுகாப்பாக பெற கடும் விதிகளை ஏற்படுத்தவும் உத்தரவிட வேண்டும்.

இவ்வாறு மனுக்களில் கூறியிருந்தனர்.

ஏற்கனவே இந்த வழக்கை விசாரித்த ஐகோர்ட்டு, எச்.ஐ.வி. பாதித்த பெண்ணை இந்த வழக்கில் ஒரு தரப்பாக சேர்க்கவும், அவர் நீதிபதிகள் அறையில் நேரில் ஆஜராக வேண்டும் என்றும் உத்தரவிட்டது.

அதன்படி அந்த பெண் தனது 2 மாத கைக்குழந்தையுடன் நீதிபதிகள் கிருபாகரன், சுந்தர் ஆகியோர் முன்பு நேற்று தனி அறையில் ஆஜரானார்.

அவரிடம் சுமார் ஒரு மணி நேரம் விசாரணை நடத்திய நீதிபதிகள், பின்னர் பிறப்பித்துள்ள உத்தரவு வருமாறு:–

கடந்த டிசம்பர் மாதம் கர்ப்பிணிக்கு ஏற்பட்ட ரத்தம் எச்.ஐ.வி. தொற்றுடன் இருந்துள்ளது. இதனால் அவருக்கு எச்.ஐ.வி. தொற்று பரவியுள்ளது. இதற்கு அந்த பெண் எந்த வகையிலும் காரணமில்லை. தற்போது மதுரை அரசு ராஜாஜி ஆஸ்பத்திரியில் அவருக்கு பெண் குழந்தை பிறந்துள்ளது. அங்கு அவர்களுக்கு உரிய சிகிச்சை அளிக்கப்படுகிறது. அவரது குழந்தைக்கு எச்.ஐ.வி. பாதிப்பு இல்லை என கூறப்பட்டுள்ளது.

இதற்கிடையே கடந்த 2 மாதங்களாக மூத்த மகளை அந்த பெண் பார்க்க அனுமதிக்கப்படவில்லை.

இதனால் அந்த பெண் மனரீதியாக பாதிக்கப்பட்டுள்ளார். மேலும் இந்த பெண்ணை பார்க்கவும், சேர்ந்து வாழவும் அவரது கணவர் விரும்புவதாக தெரியவில்லை.

எனவே தமிழக அரசு, அந்த பெண்ணுக்கு ஒரு வீடு, நிரந்தர அரசு வேலை, அவருக்கு ஏற்பட்ட மனவேதனைக்காக உரிய இழப்பீட்டை வழங்குவதுதான் பொருத்தமாக இருக்கும். இழப்பீட்டு தொகையை நிரந்தர வைப்புத்தொகையாக வங்கியில் செலுத்தி, உரிய வட்டியை மட்டும் எடுத்து செலவு செய்ய அனுமதிக்கலாம்.

அந்த பெண், பி.காம் பட்டதாரி. ஆங்கிலத்தில் தட்டச்சு செய்ய தகுதியுடையவர். அவருடைய தகுதிக்கு ஏற்ப வேலை வழங்கலாம். அவருக்கு வாழ்நாள் முழுவதும் உரிய மருத்துவ வசதிகளை செய்ய வேண்டும்.

ஆஸ்பத்திரியில் உள்நோயாளியாக இருக்க தேவையில்லை. அவர் வீட்டுக்கு சென்று, உரிய நேரத்தில் விருதுநகர் மாவட்ட அரசு ஆஸ்பத்திரியில் தேவையான சிகிச்சை பெறலாம் என டாக்டர்கள் கூறியுள்ளனர். அவருக்கு அனைத்து துறை டாக்டர்களும் அளித்த சேவைக்கு பாராட்டு தெரிவிக்கிறோம்.

பாதிக்கப்பட்ட பெண், தனது மூத்த மகளை பார்க்காமல் உள்ளதால் மனஅழுத்தத்தில் இருக்கிறார். எனவே அவருடைய கணவர் மற்றும் மூத்த மகள் ஆகியோர் வருகிற 27–ந்தேதி (அதாவது நாளை) பிற்பகல் 2.15 மணி அளவில் நீதிபதிகளின் தனி அறையில் நேரில் ஆஜராக வேண்டும்.

இவ்வாறு நீதிபதிகள் உத்தரவிட்டுள்ளனர்.