தனியார் பஸ் மோதி விபத்து: மோட்டார் சைக்கிளில் சென்ற கொத்தனார் பலி

மயிலாடுதுறை,

நாகை மாவட்டம், மயிலாடுதுறை அருகே அசிக்காடு கிராமத்தை சேர்ந்தவர் கண்ணன் (வயது 34). கொத்தனார். நேற்று முன்தினம் இரவு கண்ணனும், அவரது அண்ணன் மணிவண்ணன் (37) என்பவரும் தனி, தனியாக 2 மோட்டார் சைக்கிள்களில் மயிலாடுதுறையில் இருந்து வீட்டுக்கு சென்று கொண்டிருந்தனர்.

மயிலாடுதுறை காவிரி நகர் பகுதியில் சென்ற போது அந்த வழியாக வந்த ஒரு தனியார் பஸ், கண்ணன் ஓட்டிச்சென்ற மோட்டார் சைக்கிள் மீது மோதியது.

கொத்தனார் பலி

இதில் பலத்த காயம் அடைந்த கண்ணன் சம்பவ இடத்திலேயே பரிதாபமாக இறந்தார். தனது கண் முன்னே தம்பி துடிதுடித்து இறந்ததை கண்ட மணிவண்ணன் கதறி அழுதார்.இதுகுறித்து தகவல் அறிந்த மயிலாடுதுறை போலீஸ் இன்ஸ்பெக்டர் டெல்லிபாபு மற்றும் போலீசார், சம்பவ இடத்திற்கு விரைந்து சென்று, விபத்தில் இறந்த கண்ணனின் உடலை கைப்பற்றி பிரேத பரிசோதனைக்காக மயிலாடுதுறை அரசு மருத்துவமனைக்கு அனுப்பி வைத்தனர்.

இதுகுறித்து மணிவண்ணன் கொடுத்த புகாரின்பேரில் போலீசார் வழக்குப்பதிவு செய்து தனியார் பஸ் டிரைவர் திருவிடைமருதூர் தாலுகா திருமாந்துறை கிராமத்தை சேர்ந்த பால்ராஜ் என்பவரை வலைவீசி தேடி வருகின்றனர்.