வைக்கோல்போர் ஏற்றி வந்த சரக்கு வேன் தீயில் எரிந்து நாசம்

லாலாபேட்டை, 

திருச்சி மாவட்டம், பெட்டவாய்த்தலையை சேர்ந்தவர் பரணி (வயது 25). சரக்குவேன் டிரைவர். இவர் ஒரு சரக்கு வேனில் 25 கட்டு வைக்கோல்போர் ஏற்றி கொண்டு கரூர் மாவட்டம், லாலாபேட்டை ராமநாதன் என்பவரது வீட்டிற்கு வந்து கொண்டிருந்தார். அப்போது லாலாபேட்டை கொடிக்கால் தெரு மாரியம்மன் கோவில் அருகே வந்தபோது, தாழ்வான சென்ற மின் கம்பி மீது வைக்கோல்போரில் பட்டு எரிந்தது. இதைக்கண்ட அக்கம் பக்கத்தில் உள்ளவர்கள் கூச்சலிட்டனர். இதையடுத்து உடனடியாக பரணி இறங்கி உயிர் தப்பினார். இதையடுத்து அங்கிருந்த பொதுமக்கள் தண்ணீரை தீயை அணைக்க முயன்றனர். இருப்பினும் கட்டுப்படுத்த முடியவில்லை.

இதுகுறித்து கரூர் தீயணைப்பு நிலையத்திற்கு தகவல் தெரிவிக்கப்பட்டது. அதன்பேரில் நிலைய அதிகாரி விஜயகுமார் தலைமையிலான தீயணைப்பு வீரர்கள் சம்பவ இடத்திற்கு வந்தனர். பின்னர் தீயை தண்ணீரை ஊற்றி அணைத்தனர். இருப்பினும் வைக்கோல்போர் மற்றும் சரக்குவேன் தீயில் எரிந்து நாசமானது. இதுகுறித்து தகவல் அறிந்த வருவாய் ஆய்வாளர் சின்ன சக்கையா, கிராம நிர்வாக அதிகாரி லிங்கேஸ்வரன், மண்டல துணை வட்டார வளர்ச்சி அலுவலர் சுரேஷ் ஆகியோர் சம்பவ இடத்திற்கு பார்வையிட்டனர். இதுகுறித்து லாலாபேட்டை போலீசார் வழக்குப்பதிவு செய்து விசாரணை நடத்தி வருகின்றனர்.