ஜோலார்பேட்டை அருகே குடிநீர் தொட்டி ஆபரேட்டர் வெட்டிக்கொலை

குடிநீர் தொட்டி ஆபரேட்டர் கொலை செய்யப்பட்ட சம்பவத்தையடுத்து அந்த பகுதியில் உள்ள மதுக்கடையை மாற்றக்கோரி பொதுமக்கள் போராட்டத்தில் ஈடுபட்டனர். அப்போது டாஸ்மாக் கடை மீது கல்வீசப்பட்டதோடு பேச்சுவார்த்தைக்கு வந்த துணை போலீஸ் சூப்பிரண்டையும் பொதுமக்கள் முற்றுகையிட்டனர்.

ரமேஷ்குமார் வெட்டிக்கொலை செய்யப்பட்ட இடத்தில் ஏராளமானோர் திரண்டனர். அவரை கொலை செய்தவர்கள் மது குடிப்பதற்கு அழைத்துச்சென்றுதான் கொன்றுள்ளனர். கொலை நடந்த இடம் தாமலேரிமுத்தூர் பாட்டாளி நகர் ஏரிக்கரையாகும். அங்கு ஆரம்ப சுகாதார நிலையமும் உள்ளது. அங்கு மது குடிப்பவர்கள் அந்த வழியாக பெண்கள் செல்லும்போது ஆபாசமாக பேசி போதையில் மோதிக்கொள்கின்றனர். அந்த கடையானது ஒட்டப்பட்டியிலிருந்து புதுப்பேட்டை செல்லும் சாலையில் உள்ளது. ஏற்கனவே இந்த கடையை வேறு இடத்துக்கு மாற்ற வேண்டும் என பொதுமக்கள் வலியுறுத்தி வந்தனர்.

இந்த நிலையில் ரமேஷ்குமார் கொடூரமாக கொலை செய்யப்பட்டதால் ஆத்திரம் அடைந்த பொதுமக்கள் மதுக்கடை அருகே திரண்டு கடையை வேறு இடத்துக்கு மாற்றக்கோரி சாலையில் கற்களை வைத்து மறியலில் ஈடுபட்டனர்.

அப்போது டாஸ்மாக் கடை மீது கற்களையும் மதுபாட்டில்களையும் சிலர் வீசியதால் பரபரப்பு ஏற்பட்டது. தகவலறிந்ததும் திருப்பத்தூர் துணை போலீஸ் சூப்பிரண்டு தங்கவேலு தலைமையில் போலீசார் அங்கு விரைந்து வந்தனர். அவர்கள் போராட்டத்தில் ஈடுபட்டவர்களிடம் மறியலை கைவிடும்படி பேச்சுவார்த்தையில் ஈடுபட்டனர். ஆனால் மறியலில் ஈடுபட்டவர்கள் உடனடியாக அரசு மதுபான கடையை மாற்ற வேண்டும் என கோரி துணை போலீஸ் சூப்பிரண்டு தங்கவேலுவை முற்றுகையிட்டனர். இதனால் பரபரப்பு ஏற்பட்டது.

இந்த நிலையில் உயர் அதிகாரிகளை போலீசார் தொடர்பு கொண்டு பேசினர். அதன்பின்னர் கூறுகையில் இன்னும் 2 அல்லது 3 நாட்களுக்குள் அரசு மதுபான கடை மாற்றுவதாக உறுதி அளித்தனர். அதன்பிறகு போராட்டத்தை கைவிட்டு அனைவரும் கலைந்து சென்றனர்.