ரூ.300 கோடி மோசடி நடந்ததாக வழக்கு: சினிமா தயாரிப்பாளர் ஞானவேல்ராஜா, ராமநாதபுரத்தில் விசாரணைக்கு ஆஜர்

ஸ்டூடியோ கிரீன் சினிமா நிறுவனத்தின் உரிமையாளரும், பட தயாரிப்பாளருமான ஞானவேல்ராஜா, மதுரை ஐகோர்ட்டில் தாக்கல் செய்த மனுவில் கூறியிருந்ததாவது:-

கடந்த ஆண்டு மகாமுனி என்ற சினிமா தயாரித்தோம். இந்த படத்தின் தியேட்டர் உரிமையை நீதிமணி என்பவர் பங்குதாரராக இருந்த தருண் பிக்சர்ஸ் நிறுவனம் பெற்றது. இதற்காக ரூ.6 கோடியே 25 லட்சம் தருவதாக ஒப்புக்கொண்டது. முதல்கட்டமாக ரூ.2 கோடியே 30 லட்சம் வழங்கப்பட்டது. மீத தொகையை கொடுக்காமல் இழுத்தடித்தனர். இதனால் அந்த நிறுவனம் மீது சினிமா துறை மூலம் நடவடிக்கை எடுக்கப்பட்டது. இந்தநிலையில் கடந்த மாதம் 16-ந்தேதி ராமநாதபுரம் போலீசார் அனுப்பிய நோட்டீஸ் எனக்கு கிடைத்தது. இதை பார்த்து நான் அதிர்ச்சி அடைந்தேன். அதாவது நிதி நிறுவனத்துக்காக பணம் பெற்று மோசடி செய்ததாக ராமநாதபுரத்தை சேர்ந்த துளசிமணிகண்டன் என்பவர் ராமநாதபுரம் பஜார் போலீசில் புகார் செய்துள்ளார். இந்த புகாரில் நீதிமணி மற்றும் சிலருடன் என் பெயரும் சேர்க்கப்பட்டுள்ளது. அந்த புகாரின்பேரில் என் மீது போலீசார் வழக்குபதிவு செய்துள்ளனர். இந்த வழக்கு விசாரணைக்காக ஆஜராகுமாறு போலீசார் எனக்கு சம்மன் அனுப்பியுள்ளனர். ஆனால் எனக்கும் இந்த மோசடிக்கும் எந்த தொடர்பும் இல்லை.

இதற்கிடையே நான் ரூ.300 கோடி மோசடியில் ஈடுபட்டதாக சமூக வலைதளங்களில் தகவல்கள் பரவி வருகின்றன. எனக்கும், இதற்கும் எந்த தொடர்பும் இல்லை. எனவே ராமநாதபுரம் பஜார் போலீசார் பதிவு செய்த வழக்கில் முன்ஜாமீன் வழங்கியும், போலீசார் முன்பு ஆஜராவதில் இருந்து விலக்கு அளித்தும் உத்தரவிட வேண்டும்.

இவ்வாறு மனுவில் கூறியிருந்தார்.

இந்த வழக்கு நீதிபதி பாரதிதாசன் முன்பு நேற்று விசாரணைக்கு வந்தது. அப்போது மனுதாரர் ஞானவேல்ராஜா, ராமநாதபுரம் பஜார் போலீஸ் விசாரணைக்கு ஆஜராக உள்ளார். அவருக்கு முன்ஜாமீன் வழங்கி உத்தரவிட வேண்டும் என்று அவரது வக்கீல் வாதாடினார். முடிவில், மனுதாரரை வருகிற 14-ந்தேதி வரை கைது செய்ய தடை விதித்து நீதிபதி உத்தரவிட்டார்.