ஒரே பிரசவத்தில், எடை குறைவாக பிறந்த 3 குழந்தைகளை காப்பாற்றிய நாமக்கல் அரசு டாக்டர்கள்

நாமக்கல், 

திருச்சி மாவட்டம் மணப்பாறையை சேர்ந்தவர் சண்முகம். இவருடைய மனைவி ஜெயஸ்ரீ. இவர்களுக்கு கடந்த 2½ ஆண்டுகளுக்கு முன்பு திருமணம் நடந்தது. கடந்த ஆண்டு ஜெயஸ்ரீ கர்ப்பம் தரித்தார். அவரை அங்குள்ள தனியார் ஆஸ்பத்திரி ஒன்றில் சிகிச்சைக்காக சேர்த்தனர்.

இந்த நிலையில் ஜெயஸ்ரீக்கு கடந்த ஜூலை மாதம் ஒரே பிரசவத்தில் மிக குறைந்த எடையுடன் 3 பெண் குழந்தைகள் பிறந்தன. இதனால் அதிர்ச்சி அடைந்த ஜெயஸ்ரீயின் பெற்றோர், நாமக்கல் அரசு மருத்துவக்கல்லூரி மருத்துவமனையில் தாய் மற்றும் குழந்தைகளை சிகிச்சைக்காக சேர்த்தனர். தொடர்ந்து டாக்டர்களின் கண்காணிப்பில் இன்குபேட்டரில் வைத்து இந்த குழந்தைகளுக்கு சிகிச்சை அளிக்கப்பட்ட நிலையில் தற்போது 3 குழந்தைகளும் காப்பாற்றப்பட்டு, எடைகள் கூடி மிக ஆரோக்கியத்துடன் உள்ளன.

இது குறித்து குழந்தைகள் நல மருத்துவர் கண்ணன் கூறியதாவது:-

இந்த 3 குழந்தைகளும் பிறக்கும் போது 1 கிலோ 200 கிராம், 1 கிலோ 600 கிராம், 1 கிலோ 900 கிராம் என்ற எடை கணக்கில் தான் பிறந்து உள்ளன. நாமக்கல் அரசு மருத்துவமனையிலேயே எங்களது கண்காணிப்பில் வைத்து தாய்ப்பால் மூலமாகவும், சில சிகிச்சைகள் மூலமாகவும் மிகவும் கவனமாக கையாண்டு வந்தோம். தற்போது 3 குழந்தைகளுமே நல்ல ஆரோக்கியத்துடன் 5 கிலோ அளவிற்கு எடை உயர்ந்து உள்ளன. நாமக்கல் அரசு மருத்துவக்கல்லூரி மருத்துவமனையில் இதுபோன்ற சிகிச்சை அளிப்பது இதுதான் முதல்முறை ஆகும்.

இந்த 3 குழந்தைகளுக்கும் பிரத்தியங்கிரா, பிரகதி, பிரனிதா என குடும்பத்தார் பெயர் சூட்டி உள்ளனர். இவ்வாறு அவர் கூறினார்.

நாமக்கல் அரசு ஆஸ்பத்திரியில் கடந்த 8 மாதங்களில் சுமார் 1,700 பிரசவங்கள் நடைபெற்று இருப்பதாகவும், 751 பச்சிளங் குழந்தைகளுக்கு ஐ.சி.யு. சிகிச்சை, 50 குழந்தைகளுக்கு செயற்கை சுவாச சிகிச்சை அளிக்கப்பட்டு இருப்பதாகவும், 14 பிரசவத்தில் இரட்டை குழந்தைகள் பிறந்து இருப்பதாகவும் மருத்துவமனை டீன் சாந்தா அருள்மொழி கூறினார்.