அரியலூரில் கொரோனாவால் பாதிக்கப்பட்ட மேலும் ஒருவர் சாவு பெரம்பலூரில் 4 பேருக்கு தொற்று

அரியலூர்,

பெரம்பலூர் மாவட்டத்தில் கொரோனா தொற்று காரணமாக ஏற்கனவே 2 ஆயிரத்து 219 பேர் பாதிப்புக்குள்ளாகி சிகிச்சை பெற்று வந்தனர். இவர்களில் குணம் அடைந்த 2 ஆயிரத்து 142 பேர் வெவ்வேறு நாட்களில் அவரவர் வீடுகளுக்கு அனுப்பி வைக்கப்பட்டனர். பெரம்பலூர் மாவட்டத்தில் இதுவரை கொரோனா தொற்றினால் 21 பேர் உயிரிழந்துள்ளனர். 56 பேர் பல்வேறு ஊர்களில் உள்ள மருத்துவமனைகளில் சிகிச்சை பெற்று வருகின்றனர்.இந்நிலையில் பெரம்பலூர் மாவட்டத்தை சேர்ந்த 4 பேருக்கு கொரோனா தொற்று இருப்பது நேற்று உறுதி செய்யப்பட்டது. அவர்கள் அனைவரும் பெரம்பலூர், அரியலூர், திருச்சி மாவட்ட மருத்துவமனைகளில் சிகிச்சை பெற்று வருகின்றனர். இதன்மூலம், பெரம்பலூர் மாவட்டத்தில் கொரோனா தொற்றால் பாதிக்கப்பட்டோரின் எண்ணிக்கை 2 ஆயிரத்து 223 ஆக உயர்ந்துள்ளது.

மேலும் ஒருவர் சாவு

அரியலூர் மாவட்டத்தில் நேற்று மொத்தம் 6 பேர் கொரோனா தொற்றால் பாதிக்கப்பட்டுள்ளனர். இதில் அரியலூர் நகராட்சி பகுதியில் ஒருவரும், திருமானூர் ஒன்றியத்திற்கு உட்பட்ட பகுதியில் ஒருவரும், தா.பழூர் ஒன்றியத்திற்கு உட்பட்ட பகுதியில் ஒருவரும், ஆண்டிமடம் ஒன்றியத்திற்கு உட்பட்ட பகுதியில் ஒருவரும், அரியலூர் ஒன்றியத்திற்கு உட்பட்ட பகுதியில் ஒருவரும், வெளி மாவட்டத்தை சேர்ந்த ஒருவரும் என மொத்தம் 6 பேருக்கு கொரோனா தொற்று ஏற்பட்டுள்ளது.

இதனால் மாவட்டத்தில் பாதிக்கப்பட்டவர்களின் எண்ணிக்கை 4,494 ஆக உயர்ந்துள்ளது. இதுவரை 4,209 பேர் சிகிச்சை முடிந்து டிஸ்சார்ஜ் செய்யப்பட்டுள்ளனர். இந்நிலையில் கொரோனாவால் பாதிக்கப்பட்டவர்களில் மேலும் ஒருவர் உயிரிழந்ததை தொடர்ந்து மாவட்டத்தில் சாவு எண்ணிக்கை 48 ஆக உயர்ந்தது. நேற்று 509 பேருக்கு கொரோனா பரிசோதனை செய்யப்பட்டுள்ளது.