தமிழகம் முழுவதும் கொரோனா பாதிப்பு நாளுக்கு நாள் அதிகரித்த வண்ணம் உள்ளன. இதனைக் கட்டுப்படுத்தும் நோக்கில் பல்வேறு தளர்வுகளுடன் கூடிய இரவு நேர ஊரடங்கு, ஞாயிற்றுக்கிழமைகளில் முழு ஊரடங்கு உள்ளிட்ட உத்தரவுகள் ஏற்கனவே அமலில் இருந்து வருகின்றன.
வெறிச்சோடிய சிவகங்கை

இதன் காரணமாக சிவகங்கை நகர் பகுதிகளில் நண்பகல் 12 மணிக்கு மளிகை, காய்கறி கடைகள் அடைக்கப்பட்டன. ஒரு சில கடைகள் அடைப்பதற்கு தாமதமானது. சிவகங்கை நகராட்சி அலுவலர்கள் மற்றும் போலீசார் சோதனை செய்து கடைகளை மூட வலியுறுத்தினர். அதைத் தொடர்ந்து, கடைகள் முழுவதும் அடைக்கப்பட்டன. அதுமட்டுமின்றி நேற்று பிற்பகலுக்கு பின்னர் பொதுமக்கள் நடமாட்டமின்றி சிவகங்கை நகரின் முக்கியச் சாலைகளான அரண்மனை வாசல், காந்தி வீதி, நேரு கடை வீதி, தொண்டி சாலை, மதுரை சாலை, தெற்கு ராஜரத வீதி, திருப்பத்தூர் சாலை உள்ளிட்ட முக்கியச் சாலைகள் வெறிச்சோடி காணப்பட்டன. அத்தியாவசியமான மருந்துக் கடைகள் மட்டுமே திறக்கப்பட்டிருந்தன.
இதேபோன்று, காளையார்கோவில், இளையான்குடி, திருப்பத்தூர், திருப்புவனம், மானாமதுரை, சிங்கம்புணரி உள்ளிட்ட மாவட்டத்தின் முக்கிய நகரங்கள் மட்டுமின்றி கிராமப் பகுதிகளிலும் பொதுமக்கள் நடமாட்டமின்றி தெருக்கள் வெறிச்சோடி காணப்பட்டன.