நினைவுதினத்தையொட்டி ராஜீவ்காந்தி நினைவிடத்தில் காங்கிரஸ் கட்சியினர் மரியாதை

காஞ்சீபுரம் மாவட்டம் ஸ்ரீபெரும்புதூரில் மறைந்த முன்னாள் பிரதமர் ராஜீவ்காந்தி நினைவிடம் உள்ளது. ஒவ்வொரு ஆண்டும் மே மாதம் 21-ந்தேதி ராஜீவ்காந்தியின் நினைவு தினத்தில் காங்கிரஸ் கட்சி தலைவர்கள், நிர்வாகிகள், தொண்டர்கள் தமிழ்நாடு மட்டும் அல்லாது ஆந்திரா, கர்நாடகா, மராட்டியம், அசாம், டெல்லி உள்ளிட்ட பல்வேறு மாநிலங்களை சேர்ந்தவர்கள் ராஜீவ்காந்தி நினைவிடத்தில் வந்து அஞ்சலி செலுத்துவர்.தற்போது கொரோனா தொற்று பரவலையொட்டி ஊரடங்கு உத்தரவு அமலில் உள்ளதால் ஸ்ரீபெரும்புதூரில் உள்ள நினைவிடத்தில் அஞ்சலி செலுத்த மாநில தலைவர் உள்பட 10 பேருக்கு மட்டுமே அனுமதி அளிக்கப்பட்டது.இதையடுத்து மலர்களால் அலங்கரிக்கப்பட்ட ராஜீவ்காந்தியின் உருவம் பொறிக்கப்பட்ட நினைவிடத்தில் தமிழக காங்கிரஸ் கட்சி தலைவர் கே.எஸ்.அழகிரி மலர் தூவி, மலர் வளையம் வைத்து அஞ்சலி செலுத்தினார். பின்னர் ராஜீவ்காந்தி நினைவிடத்தில் பணிபுரியும் ஊழியர்களுக்கு எல்.ஐ.சி. மருத்துவ காப்பீட்டினை வழங்கினார்.

உலக தலைவர்களிடையே சிறந்த மனிதராக ராஜீவ்காந்தி விளங்கினார். மக்களுக்காக, நாட்டுக்காக அவர் தனது உயிரையே இழக்க நேர்ந்தது. ராஜீவ்காந்தியின் நோக்கங்கள், லட்சியங்களை, செயல்பாடுகளை காங்கிரஸ் கட்சி முன்னோக்கி எடுத்து செல்லும். தடைகளை தகர்த்து எறிந்து வெற்றியின் சிகரத்தை நாங்கள் அடைவோம். தமிழக அரசின் கொரோனா தடுப்பு பணிகள் சிறப்பாக நடந்து வருகிறது. அதற்கு எங்களுடைய வாழ்த்துகள்.தமிழக காங்கிரஸ் கட்சி சட்டமன்ற குழு தலைவரை தேர்ந்தெடுப்பதில் காலதாமதம் எதுவும் இல்லை. ஓவ்வொரு கட்சிக்கும் ஒவ்வொரு நடைமுறை உண்டு, நாங்கள் ஜனநாயக ரீதியில் எம்.எல்.ஏ.க்களிடம் வாக்கெடுப்பு நடத்தியுள்ளோம். கூடிய விரைவில் அதற்கான அறிவிப்பை வெளியிடுவோம்.

இவ்வாறு அவர் கூறினார்.

தீவிரவாத எதிர்ப்பு உறுதிமொழி

முன்னதாக நினைவிடத்தில் அனைவரும் தீவிரவாத எதிர்ப்பு உறுதிமொழி எடுத்து கொண்டனர்.நிகழ்ச்சியில் காங்கிரஸ் கட்சி முன்னாள் மாநில தலைவர் கே.வி.தங்கபாலு, ஸ்ரீபெரும்புதூர் தொகுதி எம்.எல்.ஏ. செல்வப்பெருந்தகை, மாநில எஸ்.சி.எஸ்.டி. துணைத்தலைவர் அய்யப்பன், ஸ்ரீபெரும்புதூர் நகர காங்கிரஸ் கட்சி தலைவர் அருள்ராஜ், ராஜீவ்காந்தி ஜோதி யாத்திரை தலைவர் பிரகாசம் உள்ளிட்ட காங்கிரஸ் கட்சி நிர்வாகிகள் உடன் இருந்தனர்.