பூதப்பாடியில் ரூ.2 கோடிக்கு பருத்தி விற்பனை அதிக விலைக்கு விற்றதால் விவசாயிகள் மகிழ்ச்சி

பூதப்பாடியில் ரூ.2 கோடிக்கு பருத்தி விற்பனையானது. அதிக விலைக்கு விற்றதால் விவசாயிகள் மகிழ்ச்சி அடைந்தார்கள். 

அம்மாபேட்டை அருகே உள்ள பூதப்பாடி ஒழுங்குமுறை விற்பனைக்கூடத்தில் கடந்த 2 வாரங்களாக புதன், வியாழன் ஆகிய 2 நாட்கள் பருத்தி ஏலம் நடைபெற்று வருகிறது. 

இந்த வாரம் நடைபெற்ற விற்பனைக்கு சேலம் மாவட்டம் கொங்கணாபுரம், தேவூர், கோனேரிப்பட்டி, பூலாம்பட்டி மற்றும் அந்தியூர், பவானி, அம்மாபேட்டை சுற்றுவட்டார விவசாயிகள் 7 ஆயிரத்து 916 பருத்தி மூட்டைகளை விற்பனைக்கு கொண்டு வந்திருந்தனர். பூதப்பாடி ஒழுங்குமுறை விற்பனைக்கூட கண்காணிப்பாளர் சந்திரசேகர் முன்னிலையில் ஏலம் நடைபெற்றது.

இதில் பி.டி. ரக பருத்தி ஒரு குவிண்டால் குறைந்த பட்ச விலையாக ரூ.6 ஆயிரத்து 416-க்கும், அதிகபட்சமாக ரூ.7 ஆயிரத்து 529-க்கும் ஏலம் போனது. மொத்தம் 2 கோடியே 7 லட்சத்து 11 ஆயிரத்து 835 ரூபாய்க்கு பருத்தி விற்பனையானது. தர்மபுரி, பொள்ளாச்சி, கோவை, அவினாசி, அன்னூர், சேலம், புளியம்பட்டி, கொங்கணாபுரம், அந்தியூர் பகுதிகளை சேர்ந்த விவசாயிகள் ஏலத்தில் கலந்துகொண்டு பருத்தியை வாங்கிச்சென்றார்கள். 

கடந்த வருடம் பி.டி. ரக பருத்தி குவிண்டால் அதிகபட்சமாக 4 ஆயிரத்து 200 ரூபாய்க்கு மட்டுமே ஏலம் போனது. இந்த வருடம் விலை அதிகரித்ததால் விவசாயிகள் மகிழ்ச்சி அடைந்தார்கள்.