சீனாபுரம் சந்தையில் ரூ.50 லட்சத்துக்கு மாடுகள் விற்பனை

பெருந்துறை

சீனாபுரம் சந்தையில் ரூ.50 லட்சத்துக்கு மாடுகள் விற்பனை ஆனது. 

பெருந்துறையை அடுத்துள்ள சீனாபுரத்தில், மாட்டுச்சந்தை நடைபெற்றது. இந்த சந்தைக்கு, சேலம் மாவட்டம் முத்தநாயக்கன்பட்டி, நாமக்கல் மாவட்டம் மோர்பாளையம் மற்றும் ஈரோடு மாவட்டத்தின் பல்வேறு பகுதிகளில் இருந்தும் ஏராளமான விவசாயிகள் மாடுகளை விற்பனைக்காக கொண்டு வந்திருந்தனர். 

விர்ஜின் கலப்பின பசு மாடுகள் 50-ம், அதன் கிடாரி கன்றுக்குட்டிகள் 100-ம், சிந்து மற்றும் ஜெர்சி இன பசு மாடுகள் 40-ம், அதன் கிடாரி கன்றுக்குட்டிகள் 100-ம் விற்பனைக்காக கொண்டு வரப்பட்டிருந்தன. 

இதில் விர்ஜின் கலப்பின பசு மாடு ஒன்று ரூ.30 ஆயிரம் முதல் ரூ.40.ஆயிரம் வரையும், அதன் கிடாரி கன்றுக்குட்டி ஒன்று ரூ.25 ஆயிரம் முதல் ரூ.30 ஆயிரம் வரையும் விற்பனை ஆனது. சிந்து மற்றும் ஜெர்சி இன பசு மாடு ஒன்று ரூ.20 ஆயிரம் முதல் ரூ.25 ஆயிரம் வரையும், அதன் கிடாரி கன்றுக்குட்டி ஒன்று ரூ.10 ஆயிரம் முதல் ரூ.20 ஆயிரம் வரையும் விற்பனை செய்யப்பட்டது. ரூ.50 லட்சத்துக்கு மாடுகள் விற்பனை ஆனதாக சந்தை நிர்வாகிகள் தெரிவித்தனர். பெருந்துறை, காஞ்சிக்கோவில், திங்களூர், நல்லாம்பட்டி,         சென்னிமலை, ஊத்துக்குளி, திருப்பூர், குன்னத்தூர், காங்கேயம், அவல்பூந்துறை, அறச்சலூர் உள்பட பல்வேறு பகுதிகளில் இருந்து வந்த விவசாயிகள் மற்றும் வியாபாரிகள் மாடுகளை விலைபேசி பிடித்து சென்றனர்.