கூடுவாஞ்சேரி அருகே தேவாலய வளாகத்தில் மின்சாரம் தாக்கி வாலிபர் பலி

வாலிபர் பலி

செங்கல்பட்டு மாவட்டம் கூடுவாஞ்சேரி அருகே உள்ள பெருமாட்டுநல்லூர் பிள்ளையார் கோவில் தெருவை சேர்ந்தவர் துரைபாண்டி (வயது 22). இவர் நேற்று முன்தினம் அஸ்தினாபுரத்தில் உள்ள தேவாலயத்துக்கு வழக்கம்போல் சென்று உள்ளார். அப்போது அங்கு இருந்த ஜெனரேட்டர் அருகே செல்லும்போது திடீரென மின்சாரம் தாக்கி மயங்கி கீழே விழுந்தார்.

உடனடியாக அருகில் இருந்தவர்கள் அவரை மீட்டு கூடுவாஞ்சேரியில் உள்ள தனியார் ஆஸ்பத்திரிக்கு கொண்டு சென்றனர். அங்கு டாக்டர்கள் பரிசோதனை செய்துவிட்டு ஏற்கனவே துரைபாண்டி இறந்துவிட்டதாக தெரிவித்தனர். இதனையடுத்து அவரது உடல் பிரேத பரிசோதனைக்காக செங்கல்பட்டு அரசு ஆஸ்பத்திரிக்கு அனுப்பி வைத்தனர்.

சாலை மறியல்

நேற்று இரவு பிரேத பரிசோதனைக்கு பிறகு உடலை பெற்றுக்கொண்ட அவரது உறவினர்கள் மின்சாரம் தாக்கி இறந்தவரின் உடலை தேவாலயத்தின் வாசலில் வைத்து நிவாரணம் வழங்கக்கோரி கூடுவாஞ்சேரி கொட்டமேடு சாலையில் அமர்ந்து சாலை மறியல் போராட்டத்தில் ஈடுபட்டனர். இதுபற்றி தகவல் அறிந்த வண்டலூர் தாசில்தார் ஆறுமுகம் உள்ளிடோர் சம்பவ இடத்திற்கு நேரில் சென்று சாலை மறியலில் ஈடுபட்ட பொதுமக்களிடம் பேச்சுவார்த்தை ஈடுபட்டனர்.

பேச்சுவார்த்தை

இது சம்பந்தமாக பேச்சுவார்த்தை நடத்தி உரிய நிவாரணம் பெற்றுத்தர நடவடிக்கை எடுக்கப்படும் என்று வண்டலூர் தாசில்தார் உறுதி அளித்தார். இதனையடுத்து சாலை மறியலில் ஈடுபட்ட உறவினர்கள், பொதுமக்கள் கலைந்து சென்றனர்.

இந்த மறியல் காரணமாக கூடுவாஞ்சேரி கொட்டமேடு சாலையில் போக்குவரத்து பாதிப்பு ஏற்பட்டது. இதுகுறித்து காயார் போலீசார் வழக்கு பதிவு செய்து விசாரித்து வருகின்றனர்.