வீடு இடிந்து விழுந்து தொழிலாளி பலி; 3 பேர் படுகாயம்

தாயில்பட்டி, 

ஏழாயிரம்பண்ணை அருகே மராமத்து பணியின் போது வீடு இடிந்து விழுந்து ெதாழிலாளி பலியானார். 3 பேர் காயம் அடைந்தனர். 

விருதுநகர் மாவட்டம் சாத்தூர் அருகே உள்ள ஏழாயிரம்பண்ணையை அடுத்த  கங்கரக்கோட்டை ஊராட்சியை சேர்ந்த தூங்காரெட்டியபட்டி கிராமத்தில் சண்முகநாதன் (வயது 57) என்பவருக்கு சொந்தமான பழைய வீட்டில் மராமத்து பணிக்கான கட்டுமான வேலை நடைபெற்று வந்தது. இந்த பணியில் 5-க்கும் மேற்பட்டவர்கள் ஈடுபட்டனர். 

இந்தநிலையில் கட்டிட பணி நடந்தபோது வீட்டின் சுவர் திடீரென்று விழுந்தது. சுவர் இடிந்து விழுந்ததில் அதில் இடிபாடுகளில் சிக்கி ஏழாயிரம்பண்ணையை சேர்ந்த தொழிலாளி முருகன்(50), முத்தாண்டியாபுரத்தைச் சேர்ந்த சண்முகநாத பாண்டியன்(46), கார்த்தி(25), மணிகண்டன்(24) ஆகிய 4 பேரும் படுகாயம் அடைந்தனர். இதுகுறித்து வெம்பக்கோட்டை தீயணைப்பு நிலையத்திற்கு தகவல் தெரிவிக்கப்பட்டது.

தீயணைப்பு நிலைய அலுவலர் காந்தையா தலைமையில் இடிபாடுகளில் சிக்கிய 4 பேரையும் மீட்டு சாத்தூர் அரசு மருத்துவமனைக்கு சிகிச்சைக்காக கொண்டு சென்றனர்.  இதில் முருகன், மருத்துவமனைக்கு கொண்டு செல்லும் வழியிலேயே பரிதாபமாக உயிரிழந்தார். மற்ற 3 பேரும் சாத்தூர் அரசு மருத்துவமனையில் சிகிச்சை பெற்று வருகின்றனர். இதுகுறித்து தகவல் அறிந்து வந்த ஏழாயிரம்பண்ணை சப்-இன்ஸ்பெக்டர் பாபு முருகன் மற்றும் போலீசார், முருகனின் உடலை கைப்பற்றி பிரேத பரிசோதனைக்காக அனுப்பி வைத்தனர். இந்த சம்பவம் குறித்து வீட்டின் உரிமையாளர் சண்முகநாதன் மீது வழக்குப்பதிவு செய்து அவரை கைது செய்தனர்.