மருமகன் திட்டியதால் பெண் விஷம் குடித்து தற்கொலை

பொள்ளாச்சி

பொள்ளாச்சி அருகே மருமகன் திட்டியதால் பெண் விஷம் குடித்து தற்கொலை செய்து கொண்டார். அவரது கணவருக்கு தீவிர சிகிச்சை அளிக்கப்பட்டு வருகிறது.

பொள்ளாச்சி அருகே உள்ள மாப்பிள்ளைகவுண்டன்புதூரை சேர்ந்தவர் தமிழ்செல்வன் (வயது 35). விவசாயி. இவர் வடக்குக்காட்டை சேர்ந்த சத்யா பிரியா (27) என்பவரை காதலித்து கடந்த 8 ஆண்டுகளுக்கு முன் திருமணம் செய்து கொண்டார். 

இவர்களுக்கு 6 வயதில் ஒரு மகனும், 3 மாதத்தில் ஒரு மகளும் உள்ளனர். இந்த நிலையில் மனைவி மற்றும் குழந்தைகள் வடக்குக்காட்டில் உள்ள மாமனார் வீட்டில் வசித்து வருகின்றனர்.

இதற்கிடையில் சம்பவத்தன்று 6 வயது சிறுவன் வீட்டில் டி.வி. பார்த்து கொண்டிருந்தார். இதை பார்த்த தமிழ்செல்வன் அடிக்கடி டி.வி. பார்ப்பதால் சரியாக படிப்பதில்லை என்று கூறி திட்டியதாக தெரிகிறது. 

இதனால் கணவன், மனைவிக்கு இடையே தகராறு ஏற்பட்டது. அப்போது மாமியார் மரகதம் (50) அவர்களை சமரசம் செய்வதற்கு முயன்றார்.

அப்போது ஏற்பட்ட வாக்குவாதத்தில் ஆத்திரத்தில் தமிழ்செல்வன் மாமியாரை பார்த்து எங்கள் குடும்ப விவகாரத்தில் நீங்கள் தலையீட வேண்டாம் என்று கூறி திட்டியதாக கூறப்படுகிறது. இதனால் மனமுடைந்த மரகதம், தனது கணவர் தண்டபாணி (55) என்பவரிடம் கூறி கவலைப்பட்டு உள்ளார். மேலும் விரக்தி அடைந்த தண்டபாணியும், மரகதமும் தற்கொலை செய்து கொள்ள முடிவு செய்தனர்.

இதற்காக அவர்கள் நடத்தி வரும் மளிகை கடையில் இருந்து சானிபவுடர் (விஷம்) எடுத்து கரைத்து குடித்தனர். இதை பார்த்த உறவினர்கள் 2 பேரையும் மீட்டு சிகிச்சைக்காக பொள்ளாச்சி அரசு ஆஸ்பத்திரிக்கு சிகிச்சைக்கு அனுப்பி வைத்தனர். 

அங்கு மரகதம் சிகிச்சை பலன் அளிக்காமல் பரிதாபமாக இறந்தார். முதலுதவி சிகிச்சைக்கு பின் மேல்சிகிச்சைக்காக தண்டபாணியை கோவை அரசு ஆஸ்பத்திரிக்கு அனுப்பி வைத்தனர். அங்கு அவருக்கு சிகிச்சை அளிக்கப்பட்டு வருகிறது.

இதுகுறித்து வடக்கிபாளையம் போலீசில் தண்டபாணி கொடுத்த புகாரின் பேரில் போலீசார் தற்கொலைக்கு துண்டியதாக மருமகன் தமிழ்செல்வன் மீது வழக்குபதிவு செய்து அவரை கைது செய்தனர். இந்த சம்பவம் அந்த பகுதியில் சோகத்தை ஏற்படுத்தி உள்ளது.