‘தினத்தந்தி’ புகார் பெட்டி: மக்கள் குறைகள் தொடர்பான பதிவுகள்

கிணத்துக்கடவு அருகே உள்ள கல்லாபுரத்தில் இருந்து மீனாட்சிபுரம் செல்லும் ரோடு நீண்ட நாட்களாக பழுதடைந்து இருக்கிறது. இதனால் இந்த வழியாக வாகனங்களில் செல்லும் பொதுமக்கள் பெரிதும் அவதியடைந்து வருகிறார்கள். அத்துடன் அவ்வப்போது அவர்கள் விபத்தில் சிக்கி காயத்துடன் உயிர் தப்பிச்செல்லும் நிலை நீடித்து வருகிறது. எனவே அதிகாரிகள் உடனடி நடவடிக்கை எடுத்து இந்த சாலையை சீரமைக்க வேண்டும்.  

கோவை புட்டு விக்கி சாலை உள்ளிட்ட பல இடங்களில் சாலை யில் குதிரைகள் நடமாட்டம் அதிகரித்து உள்ளது. இதனால் வாகனங்களில் செல்பவர்கள் பெரிதும் அவதியடைந்து வருகிறார்கள். மேலும் குதிரைகள் திடீரென்ற ஒன்றுக்கொன்று சண்டையிட்டு கொள்வதால், வாகன ஓட்டிகள் மீது பாய்கிறது. இதனால் விபத்துகளும் நடந்து வருகின்றன. எனவே அதிகாரிகள் நடவடிக்கை எடுத்து சாலையில் சுற்றித்திரியும் குதிரைகளை பிடிக்க வேண்டும்.

பொள்ளாச்சி ரெயில்நிலையத்தில் இருந்து கோவை, பாலக்காடு, மதுரை, பழனி உட்பட பல இடங்களுக்கு ரெயில்கள் இயக்கப்பட்டு வருகின்றன. இதனால் இந்த ரெயில் நிலையத்துக்கு வரும் பயணிகளின் எண்ணிக்கை அதிகம். ஆனால் இந்த ரெயில் நிலையத்துக்கு மிகக்குறைவான பஸ்கள் மட்டுமே இயக்கப் படுகிறது. இதனால் பயணிகள் நீண்ட நேரம் காத்திருக்கக்கூடிய நிலை ஏற்பட்டு உள்ளது. எனவே அதிகாரிகள் உடனடி நடவடிக்கை எடுத்து பொள்ளாச்சி ரெயில் நிலையத்துக்கு பஸ் நிலையத்தில் இருந்து கூடுதல் பஸ்களை இயக்க வேண்டும். 

கோவை அவினாசி ரோட்டில் ஏராளமான சிக்னல் உள்ளது. இதில் ஹோப்ஸ்காலேஜ் சிக்னலில் பிச்சை எடுப்பவர்களின் எண்ணிக்கை அதிகரித்து விட்டது. அவர்கள் சிக்னலில் வாகனங் கள் நின்றதும், வாகன ஓட்டிகளிடம் பிச்சை எடுக்கிறார்கள். பின்னர் பச்சை நிற விளக்கு ஒளிர்ந்ததும் அவர்கள் அங்கிருந்து செல்வது இல்லை. போக்குவரத்துக்கு இடையூறாக நிற்பதால் அந்த வழியாக செல்லும் வாகன ஓட்டிகள் சிரமம் அடைந்து வருகிறார்கள். எனவே அதிகாரிகள் நடவடிக்கை எடுத்து சிக்னலில் பிச்சை எடுப்பவர்களை அழைத்துச்சென்று பராமரிக்க வேண்டும்.

கோவை காந்திபுரம் 100 அடி சாலையில் தனியார் நகைக்கடை முன்பு பயணிகள் காத்திருக்க நிழற்குடை இருந்தது. பாலம் கட்டுமான பணிக்காக அந்த நிழற்குடை அகற்றப்பட்டது. தற்போது பாலம் திறக்கப்பட்டு பல மாதங்கள் ஆகிவிட்டது. ஆனால் அங்கு நிழற்குடை அமைக்கப்படவில்லை. இதனால் பயணிகள் பெரிதும் அவதியடைந்து வருகிறார்கள். எனவே அதிகாரிகள் நடவடிக்கை எடுத்து இங்கு உடனடியாக பயணிகள் நிழற்குடை அமைக்க வேண்டும்.