ஆந்திர மாநில தலைமைச் செயலாளர் மாற்றம்: பிரதமர் மோடிக்கு மம்தா பானர்ஜி கடும் கண்டனம்

ஜல்பாய்குரி,

நாடாளுமன்ற தேர்தல் நடைபெற உள்ளதால் நாடு முழுவதும் தேர்தல் நடத்தை விதிமுறைகள் அமலில் உள்ளன. இந்த சூழலில் ஆந்திர மாநில தலைமை செயலாளராக இருந்த அனில் சந்திர புனிதாவை தேர்தல் கமிஷன் கடந்த 5-ந்தேதி நீக்கியது. அவருக்கு பதிலாக மூத்த ஐ.ஏ.எஸ். அதிகாரி சுப்பிரமணியத்தை புதிய தலைமைச் செயலாளராக நியமித்தது.

இதைப்போல மேற்கு வங்காளத்தில் கொல்கத்தா மற்றும் பிதாநகர் போலீஸ் கமிஷனர்கள் உள்பட 4 ஐ.பி.எஸ். அதிகாரிகளும் சமீபத்தில் தேர்தல் கமிஷனால் மாற்றப்பட்டனர்.

ஆனால் மத்திய பா.ஜனதா அரசின் அறிவுறுத்தலின் பேரில்தான் இந்த நடவடிக்கைகளை தேர்தல் கமிஷன் மேற்கொண்டதாக கூறி மேற்கு வங்காள முதல்-மந்திரி மம்தா பானர்ஜி கொந்தளித்து உள்ளார். இது தொடர்பாக பிரதமர் மோடிக்கு அவர் கடும் கண்டனம் தெரிவித்தார்.

மேற்கு வங்காளத்தின் ஜல்பாய்குரி பகுதியில் நேற்று நடந்த பிரசார கூட்டம் ஒன்றில் பேசும்போது அவர் இது குறித்து கூறுகையில், ‘மாநில விவகாரங்களில் மத்திய அரசு ஏன் தலையிடுகிறது? ஆந்திர மாநில தலைமைச் செயலாளரை ஏன் நீக்கினீர்கள்? அப்படி கடைசி நேர மாறுதல்களில் உங்களுக்கு (மோடி) அதிக நாட்டம் இருக்கிறதென்றால், ஏன் உங்கள் மந்திரிசபை செயலாளரையோ அல்லது உள்துறை செயலாளரையோ நீக்கவில்லை?’ என காட்டமாக கேள்வி எழுப்பினார்.

முன்னதாக தனது மாநிலத்தில் ஐ.பி.எஸ். அதிகாரிகள் நீக்கப்பட்டது தொடர்பாக மத்திய தேர்தல் கமிஷனுக்கு நேற்று முன்தினம் அவர் கடிதம் ஒன்றை அனுப்பினார். அதில் அவர், ‘மேற்கு வங்காளத்தில் ஐ.பி.எஸ். அதிகாரிகள் நீக்கப்பட்டது துரதிர்ஷ்டவசமானது, மிகுந்த தன்னிச்சையானது, தூண்டப்பெற்றது மற்றும் ஒருதலைபட்சமானது’ என்று குறிப்பிட்டு இருந்தார்.

இதைப்போல வங்காள மொழி தொலைக்காட்சி ஒன்றுக்கு அவர் பேட்டியளித்த போதும், தேர்தல் கமிஷனின் நடவடிக்கைகளை விமர்சித்தார். இது தொடர்பாக அவர் கூறியதாவது:-

தேர்தல் கமிஷன் என்பது ஒரு அரசியல் சாசன அமைப்பு. அதன் மீது நான் ஆழ்ந்த மதிப்பு வைத்திருக்கிறேன். தேர்தல் கமிஷன் சிறப்பாக செயல்பட வேண்டும். ஆனால் மாநிலங்களில் பணியாற்றும் சில அதிகாரிகளை மாற்றுமாறு பா.ஜனதாவை சேர்ந்த சிலர் கேட்டுக்கொண்டால், உடனே அதை செயல்படுத்தி விடுகிறது. இதுதான் பிரச்சினை.

மேற்கு வங்காளத்தில் பணியாற்றும் திறமையான அதிகாரிகள் எந்தவித காரணமும் இன்றி மாற்றப்பட்டு இருக்கின்றனர். ஆந்திர போலீசின் முதல் நபர் மாற்றப்பட்டு இருக்கிறார். இது அவமதிப்பு இல்லையா? மத்திய அரசு, உள்துறை அமைச்சக செயலாளரைத்தான் முதலில் மாற்ற வேண்டும்.

ஒரு அதிகாரியை மாற்றுவதற்கான தேவை ஏற்பட்டது என்றால், அது குறித்து மாநில அரசிடம் தெரிவித்து 3 நபர் குழு அமைக்க சொல்ல வேண்டும். ஆனால் இந்த நடைமுறையை தேர்தல் கமிஷன் பின்பற்றவில்லை. இந்த விஷயத்தில் பா.ஜனதா கூறுவதைத்தான் அவர்கள் செயல்படுத்துகிறார்கள்.