சிறப்பு அந்தஸ்து ரத்துக்குப்பின் ஜம்மு - காஷ்மீர், லடாக் பகுதிகளில் தற்போதைய நிலை என்ன? - ‘தந்தி டி.வி.’ ஆய்வு நிலவரம்

சென்னை,

காஷ்மீர் மாநிலத்துக்கு சிறப்பு அந்தஸ்து வழங்கும் 370-வது பிரிவை ரத்து செய்யும் தீர்மானம் மற்றும் அந்த மாநிலத்தை ஜம்மு-காஷ்மீர், லடாக் என 2 யூனியன் பிரதேசங்களாக பிரிக்க வகை செய்யும் காஷ்மீர் மறுசீரமைப்பு மசோதா ஆகியவை நாடாளுமன்றத்தின் இரு அவைகளிலும் நிறைவேற்றப்பட்டு உள்ளன.

மத்திய அரசின் இந்த நடவடிக்கையால் காஷ்மீரில் பதற்றம் நிலவுகிறது. இணைய-தொலைபேசி சேவைகள் முடக்கப்பட்டு உள்ளன. ராணுவத்தினரின் பாதுகாப்பு வளையத்தில் ஜம்மு-காஷ்மீர் கொண்டுவரப்பட்டு இருக்கிறது. ஊரடங்கு உத்தரவு அமல்படுத்தப்பட்டு இருக்கிறது.

இவ்வாறு மாநிலம் முழுவதும் இடர்பாடுகள் இருந்தபோதிலும், அங்குள்ள தற்போதைய நிலவரம் குறித்து ஆய்வு செய்வதற்காக தந்தி டி.வி. ஒரு சிறப்பு குழுவை அங்கு அனுப்பி வைத்தது. தந்தி டி.வி.யின் சிறப்பு செய்தியாளர் எஸ்.சலீம் தலைமையிலான இந்த குழுவினர் காஷ்மீர் மக்களை சந்தித்து கருத்து கேட்டு, செய்திகள் சேகரித்து தந்தி டி.வி.யில் ஒளிபரப்பி உள்ளனர்.

இந்த ஆய்வின்படி அங்குள்ள கள நிலவரம் வருமாறு:-

காஷ்மீரின் கள நிலவரங்களை ஆராய்வதற்காக விமானம் மூலம் லடாக் சென்ற நிலையில், அங்கிருந்து பிற பகுதிகளுக்கு செல்ல முடியவில்லை. ஏனென்றால் அங்கு வாகனங்கள் எதுவும் இயங்கவில்லை. அதேபோல விமானம் மூலம் ஸ்ரீநகர், ஜம்முக்கு செல்லலாம். ஆனால் அங்கிருந்து ஊருக்குள் செல்ல வாகனங்கள் எதுவும் கிடையாது.



மிகவும் பதற்றம் நிறைந்த பகுதியாக காஷ்மீர் மாறியிருக்கிறது. இணையதள சேவையை தொடர்ந்து தொலைபேசி சேவையும் துண்டிக்கப்பட்டு இருக்கிறது. கடைகள் அனைத்தும் அடைக்கப்பட்டு இருக்கின்றன. ஊரடங்கு உத்தரவு அமலில் இருப்பதால் 4 பேர் சேர்ந்து நடக்கக்கூட முடியாத நிலை உள்ளது. இணையதள-தொலைபேசி சேவை முடங்கியிருப்பதால் மக்கள் குழப்பத்தில் இருக்கிறார்கள். முக்கிய தலைவர்களும் காவலில் வைக்கப்பட்டிருப்பதால் உச்சக்கட்ட பதற்றம் நிலவும் பகுதியாக காஷ்மீர் இருந்து வருகிறது.

காஷ்மீர் பகுதி இஸ்லாமியர்கள் அதிகம் நிறைந்திருக்கும் பகுதி என்பதால் தீவிர கண்காணிப்பு வளையத்தில் வைக்கப்பட்டு இருக்கிறது. விமான நிலையம் உள்ளிட்ட முக்கிய பகுதிகளுக்கு மட்டுமே வாகனங்கள் இயக்கப்படுகின்றன. ஊருக்குள் செல்வதற்கு எந்த வாகனங்களும் இல்லை.

ஆனால் ஜம்மு பகுதியானது, இந்துக்கள் அதிகம் வாழும் இடமாகும். எனவே காஷ்மீருக்கான சிறப்பு அந்தஸ்து ரத்து நடவடிக்கை இப்பகுதியினருக்கு மகிழ்ச்சியையே அளித்துள்ளது.



இதுகுறித்து அவர்கள் கூறுகையில், ‘இதுநாள் வரையிலும் முக்கியமான பணிகளுக்காக ஜம்முவில் 6 மாதமும், காஷ்மீரில் 6 மாதமும் அலைந்து திரிந்த நிலைமை இனி ஏற்படாது என்று நம்புகிறோம். தற்போது யூனியன் பிரதேசமாக லடாக் மாறியுள்ள நிலையில் பாஸ்போர்ட் பதிவு உள்ளிட்ட எல்லா பணிகளையும் எங்கள் சொந்த பூமியிலேயே எங்களால் மேற்கொள்ள முடியும்.

சிறிய பணிகள் என்றாலும் இங்கிருந்து ஜம்மு அல்லது காஷ்மீர் சென்று உணவு கஷ்டத்திலும், அலைச்சல் உள்ளிட்ட சங்கடத்திலும் சிக்கும் நிலைமை இனி ஏற்படாது. தாமதமான முடிவு என்றாலும் நல்ல முடிவு’ என்று மகிழ்ச்சி தெரிவிக்கிறார்கள்.



அங்குள்ளவர்கள் கூறும்போது, “சீனா-பாகிஸ்தான் எல்லைப்பகுதியில் இருக்கும் பகுதி கார்கில். எனவே இந்த நடவடிக்கை குறித்து எங்களிடம் கருத்து கேட்டிருக்கலாம். ஆனால் ஒரு முன்னறிவிப்பு கூட கொடுக்கவில்லை. மக்கள் கருத்தை மதிக்காத அரசின் தன்னிச்சையாக போக்கில் எங்களுக்கு விருப்பம் இல்லை. அரசியல் சாசனத்தில் 370-வது பிரிவு நீக்கப்பட்டிருப்பதால் எங்கள் நிலத்தை இனி வெளிமாநிலத்தார் உள்பட யார் வேண்டுமானாலும் வாங்கிக்கொள்ளும் நிலை உருவாகி இருக்கிறது. இது ஒருபுறம் கவலை அளிக்கிறது. மேலும் இனி எங்கள் அத்தியாவசிய சேவைகளுக்காக யூனியன் பிரதேசமான லடாக்குக்கு செல்லவேண்டும். இதை ஏற்கவே முடியாது” என்று கவலை தெரிவித்தனர்.

எனினும் கார்கிலை சேர்ந்த மற்றொரு பிரிவினர் மகிழ்ச்சி தெரிவிக்கிறார்கள். அவர்கள் கூறுகையில், ‘லடாக், சுற்றுலா தலங்கள் நிறைந்த பகுதி. மத்திய அரசின் இந்த புதிய நடவடிக்கையால் சுற்றுலா மேம்படும். அது உண்மை தான், எங்களுக்கு மகிழ்ச்சியும் கூட’ என்று ஆதரவு தெரிவிக்கிறார்கள்.



ஒட்டுமொத்தத்தில் மத்திய அரசின் இந்த நடவடிக்கை ஜம்மு, லடாக் பகுதிகளில் வரவேற்பை பெற்றிருக்கிறது. காஷ்மீரில் மட்டும் கடும் கொந்தளிப்பை ஏற்படுத்தி இருக்கிறது.