பரூக் அப்துல்லா வீட்டைவிட்டு வெளியேறத் தடை? கட்சி நிர்வாகிகள் புகார்

ஸ்ரீநகர்,

ஜம்மு காஷ்மீர் தலைநகர் ஸ்ரீநகரில் உள்ள ஹஸ்ராத்பால் மசூதியில் மிலாது நபி திருநாளான இன்று சிறப்புத் தொழுகை நடத்த ஏற்பாடு செய்யப்பட்டு இருந்தது. இன்று நடக்கும் சிறப்புத் தொழுகையில் தேசிய மாநாட்டுக் கட்சியினர் மற்றும் பல்வேறு கட்சியினரும், மக்களும் திரளாகப் பங்கேற்பார்கள் என எதிர்பார்க்கப்பட்டது.

இந்நிலையில் தொழுகைக்கு தேசிய மாநாட்டுக் கட்சி தலைவர் பரூக் அப்துல்லா வீட்டை விட்டு வெளியேற முயன்றபோது அவரை அதிகாரிகள் தடுத்து நிறுத்தியதாகத் தகவல்கள் வெளியாகியுள்ளன.

இதுகுறித்து தேசிய மாநாட்டுக் கட்சியின் டுவிட்டர் பதிவில், ''தேசிய மாநாட்டுக் கட்சியின் தலைவர் பரூக் அப்துல்லாவைத் தொழுகைக்கு வெளியேறவிடாமல் ஜம்மு காஷ்மீர் நிர்வாகம் வீட்டிலேயே தடுத்து வைத்துள்ளது. அடிப்படை உரிமையான வழிபாட்டு உரிமையைப் பறிப்பதை ஜம்மு காஷ்மீர் தேசிய மாநாட்டுக் கட்சி கடுமையாகக் கண்டிக்கிறது. அதிலும் குறிப்பாக மிலாது நபி திருநாளில் தொழுகை நடத்தவிடாமல் தடுக்கிறார்கள்”என்று தெரிவிக்கப்பட்டுள்ளது. 

ஆனால், பரூக் அப்துல்லா வீட்டில் தடுத்து வைக்கப்பட்டுள்ளாரா என்று அதிகாரிகளிடம் செய்தியாளர்கள் கேட்ட போது, எந்த பதிலும் கிடைக்கவில்லை.