கர்நாடக தேர்தல்: 40 நட்சத்திர பேச்சாளர்களின் பட்டியலை வெளியிட்டது காங்கிரஸ்..!

பெங்களூரு,

கர்நாடகாவில் அடுத்த மாதம் 10-ம் தேதி சட்டசபை தேர்தல் நடைபெற உள்ள நிலையில், வேட்பு மனு தாக்கல் விறுவிறுப்பாக நடைபெற்று வருகிறது. வேட்பு மனு தாக்கல் நாளை நிறைவடைய உள்ள நிலையில் காங்கிரஸ் கட்சி இன்று 5-வது வேட்பாளர் பட்டியலை வெளியிட்டுள்ளது. இதில் 4 வேட்பாளர்கள் இடம்பெற்றுள்ளனர்.

பா.ஜ.க. முதல் மந்திரி பசவராஜ் பொம்மை போட்டியிடும் ஷிகோன் தொகுதியில் போட்டியிட யாசிர் அகமது கான் பதானுக்கு வாய்ப்பு வழங்கப்பட்டுள்ளது. மொத்தம் உள்ள 224 தொகுதிகளில் காங்கிரஸ் கட்சி இதுவரை மொத்தம் 220 வேட்பாளர்களை அறிவித்துள்ளது.

இந்நிலையில், காங்கிரஸ் கட்சியின் நட்சத்திர பேச்சாளர்கள் பட்டியல் இன்று வெளியிடப்பட்டுள்ளது. அதில் 40 பேரின் பெயர்கள் இடம் பெற்றுள்ளன. காங்கிரஸ் தலைவர் மல்லிகார்ஜுன கார்கே, சோனியா காந்தி, ராகுல் காந்தி, பிரியங்கா காந்தி, கர்நாடக மாநில காங்கிரஸ் தலைவர் டி.கே.சிவகுமார், எதிர்க்கட்சி தலைவர் சித்தராமையா, கே.சி.வேணுகோபால், கர்நாடக மாநில காங்கிரஸ் பொறுப்பாளர் ரந்தீப் சிங் சுர்ஜிவாலா, ஹரிபிரசாத், எம்.பி. ,துணை முதல்-மந்திரி பரமேஷ்வர் உள்ளிட்டோர் இடம்பெற்றுள்ளனர்.

மேலும் முன்னாள் எம்பி கே.எச்.முனியப்பா, முன்னாள் மத்திய அமைச்சர்கள் ஜெய்ராம் ரமேஷ், வீரப்ப மொய்லி, கர்நாடக முன்னாள் அமைச்சர்கள் ராமலிங்க ரெட்டி, சதீஷ் ஜார்கிகோளி, எம்.பி டி.கே.சுரேஷ், சந்திரசேகர், சையத் நசீர் உசேன், ஜமீர் அகமது கான், எச்.எம்.ரேவண்ணா, முன்னாள் அமைச்சருமான உமாஸ்ரீ, ராஜஸ்தான் முதல்-மந்திரி அசோக் கெலாட். , சத்தீஸ்கர் முதல்-மந்திரி பூபேஷ் பாகல், தமிழகத்தைச் சேர்ந்த ப.சிதம்பரம், எம்.பி. சசி தரூர், நடிகை ரம்யா ஆகியோர் 40 நட்சத்திர பேச்சாளர்களாக நியமிக்கப்பட்டுள்ளனர். சச்சின் பைலட் பெயர் இந்தப் பட்டியலில் இடம்பெறவில்லை.