பொது சிவில் சட்டத்திற்கு சிவசேனா ஆதரவு- நாடாளுமன்றத்தில் விவாதம் நடத்த கோரிக்கை

மும்பை

மத்திய அரசு கொண்டு வர திட்டமிட்டு உள்ள பொது சிவில் சட்டத்துக்கு ஏக்நாத் ஷிண்டே தலைமையிலான சிவசேனா ஆதரவு தெரிவித்து உள்ளது. இதுதொடர்பாக அந்த கட்சியின் எம்.பி. ராகுல் செவாலே கூறியதாவது:- பொது சிவில் சட்டத்துக்கு ஆதரவாக வருகிற மழைக்கால கூட்டத்தொடரில் மராட்டிய சட்டசபையில் தீர்மானம் நிறைவேற்ற வேண்டும் முதல்-மந்திரி ஏக்நாத் ஷிண்டேயை கேட்டுகொள்கிறோம். மேலும் பொது சிவில் சட்டத்தில் மராட்டியத்தின் நிலைப்பாட்டை கூறும் வகையில் சட்டசபையில் நிறைவேற்றப்படும் தீர்மானம் மத்திய அரசுக்கு அனுப்பி வைக்கப்பட வேண்டும்.

பொது சிவில் சட்டம் சிவசேனா நிறுவனர் பால்தாக்கரேவின் 3 கனவுகளில் ஒன்றாகும். அயோத்தியில் ராமர் கோவில் கட்ட வேண்டும், காஷ்மீரில் சிறப்பு அந்தஸ்தை ரத்து செய்ய வேண்டும், நாட்டில் பொதுசிவில் சட்டம் அமல்படுத்த வேண்டும் என்பது பால்தாக்கரேவின் கனவு. இதில் 2-ஐ மோடி நிறைவேற்றிவிட்டார். 3-வது கனவும் விரைவில் நிறைவேறும். எல்லா மக்களின் நலனுக்காகவும் பால் தாக்கரே பொது சிவில் சட்டத்தை ஆதரித்தார். குறிப்பாக பெண்கள் சமமாக நடத்தப்படுவார்கள்" என்றார்.