மதுஅருந்த பணம் தராததால் உருட்டு கட்டையால் அடித்து பெண் கொலை; கணவருக்கு வலைவீச்சு

சிக்கமகளூரு;

மது அருந்த பணம் தராததால்..

.

சிக்கமகளூரு மாவட்டம் கொப்பா தாலுகா ஜெயபுரா அருகே தலவானே கிராமத்தை சேர்ந்தவர் திம்மையா (வயது 43). இவரது மனைவி ராதா (34). இந்த தம்பதி அதே பகுதியில் உள்ள காபி தோட்டத்தில் வேலை செய்து வந்தனர். திம்மையா மதுஅருந்தும் பழக்கத்திற்கு அடிமையானவர் என கூறப்படுகிறது. மேலும், அவர் தினமும் இரவில் மதுஅருந்திவிட்டு வீட்டிற்கு வந்து மனைவி ராதாவிடம் தகராறு செய்து வந்துள்ளார்.

மேலும் மதுஅருந்துவதற்கு பணம் கேட்டும் வாக்குவாதம் செய்வதாகவும் கூறப்படுகிறது. இந்த நிலையில் சம்பவத்தன்று திம்மையா மதுஅருந்திவிட்டு வீட்டிற்கு வந்துள்ளார். அவர் தனது மனைவியிடம் மேலும் மதுகுடிக்க பணம் தருமாறு கேட்டு தகராறு செய்துள்ளார். பணம் கொடுக்க ராதா மறுத்ததாக தெரிகிறது.

இதனால் இருவருக்கும் இடையே வாக்குவாதம் ஏற்பட்டது. இந்த சந்தர்ப்பத்தில் ஆத்திரமடைந்த திம்மையா வீட்டில் இருந்த உருட்டுகட்டையை எடுத்துவந்து மனைவி ராதாவைசரமாரியாக தாக்கியுள்ளார்.

வலைவீச்சு

இதில் படுகாயம் அடைந்த ராதா ரத்தவெள்ளத்தில் துடிதுடித்து சம்பவ இடத்திலேயே உயிரிழந்தார். இதையடுத்து திம்மையா அங்கிருந்து தப்பி சென்றுவிட்டார். இதுகுறித்து அக்கம்பக்கத்தினர் ஜெயப்புரா போலீசாருக்கு தகவல் கொடுத்தனர்.

அதன்பேரில் போலீசார் சம்பவ இடத்திற்கு விரைந்து வந்து பார்வையிட்டனர். மேலும் ராதாவின் உடலை கைப்பற்றி பிரேத பரிசோதனைக்காக ஆஸ்பத்திரிக்கு அனுப்பி வைத்தனர். விசாரணையில் மது அருந்த பணம் தராததால் திம்மையா, மனைவி ராதாவை அடித்து கொலை செய்தது தெரியவந்தது. இதுகுறித்து ஜெயப்புரா போலீசார் வழக்குப்பதிவு செய்து தலைமறைவாக உள்ள திம்மையாவை வலைவீசி தேடிவருகின்றனர்.