கொள்ளேகால் நகரசபை தேர்தல்: கட்சி மாறி வாக்களித்த 7 பேரின் மேல் முறையீட்டு மனு தள்ளுபடி

கொள்ளேகால்:

கொள்ளேகால் நகரசபை தேர்தல்

சாம்ராஜ்நகர் மாவட்டம் கொள்ளேகால் நகரசபை தலைவர் மற்றும் துணை தலைவர் தேர்தல் கடந்த 2020-ம் ஆண்டு ஆகஸ்டு மாதம் 29-ந் தேதி நடந்தது. இதில் பா.ஜனதா மற்றும் காங்கிரஸ் சார்பில் நேரடி போட்டி நிலவியது. இதில் வெற்றி பெற பா.ஜனதாவிற்கு கூடுதலாக 7 உறுப்பினர்கள் தேவைப்பட்டது. இதற்காக பகுஜன் சமாஜ் கட்சியை சேர்ந்த மகேஷ் எம்.எல்.ஏ.வின் ஆதரவை பா.ஜனதா நாடியது.

7 பேர் பதவி நீக்கம்

இதை ஏற்ற அவர் பகுஜன் சமாஜ் கட்சியை சேர்ந்த பவித்ரா, கங்கம்மா, நாகமணி, நாகசுந்தரம்மா, பிரகாஷ், ராமகிருஷ்ணா, நசீர் செரீப் ஆகிய 7 நகரசபை உறுப்பினர்களை, பா.ஜனதாவிற்கு ஆதரவாக வாக்களிக்கும்படி செய்தார். இதையறிந்த பகுஜன் சமாஜ் கட்சி மேலிடம் அதிருப்தி அடைந்தது.

இதையடுத்து 7 உறுப்பினர்களின் செயல்பாடுகளை கண்டித்தது அவர்கள் மீது சட்டப்படி நடவடிக்கை எடுக்கவேண்டும் என்று கட்சி சார்பில் மாவட்ட கலெக்டரிடம் புகார் அளிக்கப்பட்டது.

மேல்முறையீடு மனு தள்ளுபடி

இதை ஏற்ற அப்போதைய கலெக்டர் ரவி, 7 பேரையும் உறுப்பினர்கள் பதவியில் இருந்து தகுதி நீக்கம் செய்து உத்தரவிட்டார். இதை எதிர்த்து 7 பேரும் கர்நாடக ஐகோர்ட்டில் மனு தாக்கல் செய்தனர். இந்த மனு மீதான விசாரணை கடந்த 2 ஆண்டாக நடந்து வந்தது.

இந்த நிலையில் கடந்த 2021-ம் ஆண்டு செப்டம்பர் மாதம் 21-ந் தேதி இவ்விவகாரத்தில் 7 பேரின் தகுதி நீக்கம் உத்தரவு செல்லும் என்று ஐகோர்ட்டு தீர்ப்பு கூறியது. இதை எதிர்த்து 7 பேர் தரப்பிலும் கர்நாடக ஐகோர்ட்டில் மேல் முறையீடு செய்யப்பட்டது. இந்த மனுவை விசாரித்த ஐகோர்ட்டு நீதிபதி, கலெக்டர் உத்தரவில் எந்த மாற்று கருத்தும் இல்லை என்றும், அதனால் தகுதி நீக்கம் செல்லும் என்று கூறி மேல்முறையீடு மனுவை தள்ளுபடி செய்து உத்தரவிட்டார்.