தேங்கிய மழைநீரில் நடந்து சென்றபோது பரிதாபம்; மின்சாரம் தாக்கி 2 தெருநாய்கள் பலி

சென்னையில் நேற்று முன்தினம் இரவு திடீரென பெய்த மழையால் ஆங்காங்கே மழைநீர் குளம் போல் தேங்கிய நிலையில் உள்ளது. அந்தவகையில் டி.பி.சத்திரம் 14-வது சாலையில் நேற்று முன்தினம் பெய்த மழையால் சாலையோரத்தில் மழைநீர் தேங்கி இருந்தது.

தேங்கிய மழைநீரில் அருகே மின்கசிவு ஏற்பட்டு மின்சாரம் கசிந்தாக தெரிகிறது. இந்தநிலையில் அவ்வழியாக வந்த 2 தெரு நாய்கள் தேங்கிய மழைநீரில் ஆபத்து இருப்பதை அறியாமல் நீரில் நடந்து சென்றன. அப்போது மின்சாரம் தாக்கி 2 நாய்களும் தூக்கி வீசப்பட்டன.

இதில் சம்பவ இடத்திலேயே அந்த 2 நாய்களும் பரிதாபமாக உயிரிழந்தன. தகவலின் பேரில் விரைந்து வந்த மின்வாரிய ஊழியர்கள் உடனடியாக அந்த பகுதியில் மின்சாரத்தை துண்டித்தனர். பின்னர் இறந்த நாய்களை அப்புறப்படுத்தினர். தேங்கிய மழைநீரில் மின்சாரம் பாய்ந்து தெரு நாய்கள் உயிரிழந்த சம்பவம் அந்த பகுதி மக்களிடையே பீதியை ஏற்படுத்தியுள்ளது.