2 வாலிபர்கள் தூக்குப்போட்டு தற்கொலை

தஞ்சாவூா், ஜூன்.21-

தஞ்சையில் வெவ்வேறு இடங்களில் 2 வாலிபர்கள் தூக்குப்போட்டு தற்கொலை செய்து கொண்டனர்.

குடும்ப பிரச்சினை

தஞ்சை கீழ வாசல் புதுத்தெருவை சேர்ந்தவர் வினோத்குமார் (வயது29). டிரைவர். இவர் தஞ்சையை சேர்ந்த ஒரு பெண்ணை காதலித்து திருமணம் செய்து கொண்டார். கணவன், மனைவி இடையே அடிக்கடி குடும்ப பிரச்சினை இருந்து வந்ததாக கூறப்படுகிறது. இதனால் அவருடைய மனைவி கோபித்து கொண்டு தனது தாய் வீட்டிற்கு சென்று விட்டார்.மேலும் வினோத்குமார் உடல்நிலை சரியில்லாமல் அவதிப்பட்டு வந்துள்ளார். இதனையடுத்து மனமுடைந்த நிலையில் இருந்த அவர் நேற்று முன்தினம் வீட்டில் தூக்குப்போட்டு தற்கொலை செய்து கொண்டார். இதுகுறித்து தஞ்சை கிழக்கு போலீஸ் இன்ஸ்பெக்டர் கருணாகரன், சப்-இன்ஸ்பெக்டர் குமார் மற்றும் போலீசார் வழக்குப்பதிவு செய்து விசாரணை நடத்தி வருகிறார்கள்.

தூக்குப்போட்டு தற்கொலை

இதே போல் தஞ்சை பழைய வீட்டு வசதி வாரிய குடியிருப்பு பகுதியை சேர்ந்தவர் விமல்ராஜ் (32). இவர் தஞ்சையில் உள்ள ராசாமிராசுதார் ஆஸ்பத்திரியில் ஊழியராக வேலை பார்த்து வந்தார். இவர் கடந்த சில மாதங்களாக வயிற்று வலியால் அவதிப்பட்டு வந்ததாக கூறப்படுகிறது. இதற்காக அவர் பல்வேறு இடங்களில் சிகிச்சை பெற்றும் பயனில்லை. இதனால் மனமுடைந்த அவர் வீட்டில் தூக்குப்போட்டு தற்கொலை செய்து கொண்டார்.இதுகுறித்து தகவல் அறிந்த தஞ்சை தெற்கு போலீசார் சம்பவ இடத்திற்கு விரைந்து சென்று விமல் ராஜ் உடலை மீட்டு தஞ்சை மருத்துவக்கல்லூரி ஆஸ்பத்திரிக்கு பிரேத பரிசோதனைக்காக அனுப்பி வைத்தனர். இதுகுறித்த புகாரின் பேரில் போலீஸ் இன்ஸ்பெக்டர் ஸ்ரீதர் வழக்குப்பதிவு செய்து விசாரணை நடத்தி வருகிறார்.