கைது செய்யட்டும் பார்த்துக்கொள்கிறோம்: டி.டி.வி.தினகரன் ஜாமீன் கேட்க மாட்டார்

சென்னை,

அ.தி.மு.க. (அம்மா) துணை பொதுச்செயலாளர் டி.டி.வி.தினகரனின் ஆதரவாளர் வெற்றிவேல் நேற்று சென்னை அடையாறில் நிருபர்களுக்கு பேட்டியளித்தார். அப்போது நிருபர்கள் கேட்ட கேள்விகளும், அதற்கு அவர் அளித்த பதில்களும் வருமாறு:–கேள்வி:– டி.டி.வி.தினகரன் கைது செய்யப்பட வாய்ப்பு இருப்பதாகவும், அதற்காக தனிப்படை அமைக்கப்பட்டு இருப்பதாகவும் தகவல் வருகிறதே?

பதில்:– கட்சிக்காரர்கள் நோட்டீசு வெளியிடுகிறார்கள். அதற்கும், துணை பொதுச்செயலாளருக்கும் என்ன சம்பந்தம் இருக்கிறது.

கேள்வி:– தினகரன் தரப்பில் ஜாமீன் போடப்பட்டுள்ளதா?

பதில்:– நாங்கள் ஏன் ஜாமீன் போட வேண்டும். கைது செய்யட்டும் பார்த்துக் கொள்கிறோம். சிறப்பு படை அமைத்து பிடிக்க நாங்கள் என்ன பயங்கரவாதியா?.

கேள்வி:– சசிகலா பரோலில் வர இருக்கும் நேரத்தில் டி.டி.வி.தினகரனை கைது செய்துவிட்டால் எந்த பிரச்சினையும் இருக்காது என்ற காரணத்தினால் இந்த நடவடிக்கை எடுக்கப்படுகிறது என்று கூறப்படுகிறதே?

பதில்:– சசிகலா வெளியே வருவதால் என்ன பிரச்சினை வரப்போகிறது. தீர்ப்புக்கு கட்டுப்பட்டு சிறைச்சாலையில் அவர் இருக்கிறார். அவர் வெளியே வருவதால் என்ன சட்டம்–ஒழுங்கு பிரச்சினை ஏற்படும்?.

கேள்வி:– சசிகலா பரோலில் வந்தால் அ.தி.மு.க.வில் அடுத்தகட்ட நகர்வு என்னவாக இருக்கும்?

பதில்:– அவர் சொந்த வி‌ஷயத்துக்காக வருகிறார். அதற்கும், அரசியலுக்கும் சம்பந்தம் இல்லை. ஜெயிலுக்கு என்று தனிச்சட்ட திட்டம் இருக்கிறது. சசிகலா பரோலில் வந்தால் நாங்கள் அவரை சென்று பார்ப்போம். அதுவே ஒரு அரசியல் தானே.  இவ்வாறு அவர் பதிலளித்தார்.