வாக்காளர் பட்டியல் தயாரிப்பு பணி தொடர்பாக ஆலோசனை - நவம்பர் 3-ந்தேதி அனைத்து கட்சி கூட்டம்

சென்னை,

தமிழகத்தில் 2021 ஆம் ஆண்டு சட்டமன்ற தேர்தல் நடைபெற இன்னும் சில மாதங்களே உள்ள நிலையில், இறுதி வாக்காளர் பட்டியலை வரும் ஜனவரி 20-ந் தேதி வெளியிட இந்திய தேர்தல் ஆணையம் உத்தரவிட்டுள்ளது. இதனையடுத்து தமிழக தலைமை தேர்தல் அதிகாரி சத்யபிரத சாகு, வரைவு வாக்காளர் பட்டியல் வெளியிடுவது தொடர்பான பணிகளை மேற்கொள்வது குறித்து, மாவட்ட தேர்தல் அதிகாரிகளுடன் (மாவட்ட கலெக்டர்கள்) கடந்த செப்டம்பர் 3-ந் தேதி ஆலோசனை மேற்கொண்டார்.

இந்த நிலையில் நேற்று சத்யபிரத சாகு அறிவிப்பு ஒன்றை வெளியிட்டார். அதில், வாக்காளர் பட்டியல் தயாரிப்பு தொடர்பான சிறப்பு சுருக்கமுறை திருத்தப் பணிகள் குறித்து நவம்பர் 3-ந் தேதி, தலைமைச்செயலகத்தில் அனைத்து கட்சி கூட்டம் கூட்டப்படும் என்று குறிப்பிட்டுள்ளார்.

வாக்காளர் பட்டியலில் ஒன்றுக்கும் மேற்பட்ட இடங்களில் பெயர் பதிவு செய்யப்பட்டிருப்பது, இறந்தவர் பெயர் நீக்காமல் இருப்பது உள்பட சில குற்றச்சாட்டுகளை தி.மு.க. உள்ளிட்ட அரசியல் கட்சிகள் ஏற்கனவே கூறி வரும் நிலையில், நவம்பர் 3-ந் தேதி நடக்கும் அனைத்து கட்சி கூட்டத்தில் இதுபற்றி ஆலோசிக்கப்படும் என்று தெரிவிக்கப்பட்டுள்ளது.