வாலிபரை தாக்கிய கல்லூரி மாணவர்கள் 3 பேர் கைது

திருச்சி பாலக்கரை சவேரியார் கோவில் தெருவை சேர்ந்தவர் ஜெபராஜ் (வயது 20). இவருடைய நண்பர் லலித், வயலூர் சாலையில் உள்ள ஒரு கல்லூரியில் படித்து வருகிறார். இந்தநிலையில், லலித்திடம் அதே கல்லூரியில் படிக்கும் எடமலைப்பட்டிபுதூரை சேர்ந்த மணி (19) என்பவர் தகராறு செய்ததாக தெரிகிறது. இது பற்றி அவர் தனது நண்பர் ஜெபராஜிடம் கூறியுள்ளார். இதையடுத்து நேற்று முன்தினம் மதியம் மணியிடம் சென்று இதுபற்றி ெஜபராஜ் தட்டிக்கேட்டுள்ளார். இதனால் ஏற்பட்ட தகராறில் மணி, தன்னுடன் படிக்கும் நண்பர்கள் முருகன், ராபின் ஆகியோருடன் சேர்ந்து ஜெபராஜை தாக்கியதாக கூறப்படுகிறது. இதுகுறித்த புகாரின் பேரில் கல்லூரி மாணவர்கள் 3 பேர் மீதும் போலீசார் வழக்குப்பதிவு செய்து அவர்களை கைது செய்தனர். பின்னர் 3 பேரும் ஜாமீனில் விடுவிக்கப்பட்டனர்.