வெவ்வேறு சம்பவங்களில் ஜோதிடர் உள்பட 3 பேர் சாவு

வெவ்வேறு சம்பவங்களில் ஜோதிடர் உள்பட 3 பேர் இறந்தனர்.

மோட்டார் சைக்கிளில்...

லால்குடி அருகே உள்ள பூவாளூர் மாதா கோவில் தெருவை சேர்ந்தவர் அமிர்தராஜ். இவரது மகள் குணாநான்சி (வயது 25).நர்சிங் வரை படித்துள்ள இவர் திருச்சியில் உள்ள ஒரு கடையில் வேலை பார்த்து வந்தார். நேற்று முன்தினம் இரவு இவரும், லால்குடி அருகே உள்ள பல்லபுரம் பகுதியைச் சேர்ந்த செல்வராஜ் மகன் பிராங்கிளின் மில்டன் (26) என்பவரும் மோட்டார் சைக்கிளில் திருச்சியில் இருந்து பூவாளுருக்கு சென்று கொண்டிருந்தனர்.

மோட்டார் சைக்கிளை பிராங்கிளின் மில்டன் ஓட்டினார். குணாநான்சி பின்னால் அமர்ந்து இருந்தார். மோட்டார் சைக்கிள் புறவழிச்சாலையில் மாடக்குடி அருகே சென்றபோது, பின்னால் அமர்ந்திருந்த குணா நான்சி திடீரென நிைல தடுமாறி கீழே விழுந்தார். இதை கண்ட அங்கிருந்தவர்கள் அவரை மீட்டு 108 ஆம்புலன்ஸ் மூலம் சிகிச்சைக்காக ஸ்ரீரங்கம் அரசு மருத்துவமனைக்கு அனுப்பி வைத்தனர். அங்கு அவரை பரிசோதனை செய்த டாக்டர்கள் அவர் ஏற்கனவே இறந்து விட்டதாக தெரிவித்தனர். இது குறித்த புகாரின் பேரில் சமயபுரம் போலீசார் வழக்குப்பதிவு செய்து விசாரணை நடத்தி வருகின்றனர்.

ஜோதிடர் திடீர் சாவு

சென்னை கோடம்பாக்கம் முத்துவேல் நாயக்கர் தெருவை சேர்ந்தவர் முகன் (55). ஜோதிடர். இவர் பல்வேறு ஊர்களுக்கு சென்று ஜோதிடம் பார்ப்பது வழக்கம். இந்த நிலையில் முகன் ஸ்ரீரங்கம் அம்மா மண்டபம் சாலை சுப்பிரமணிய ஐயர் தெருவில் உள்ள ஒரு அடுக்குமாடி குடியிருப்பில் வாடகைக்கு தங்கி இருந்தார். சம்பவத்தன்று வீட்டில் இருந்த முகன் இறந்து கிடந்தார். இது குறித்து ஸ்ரீரங்கம் போலீசார் வழக்குப்பதிவு செய்து, அவர் திடீரென்று எப்படி இறந்தார் என்பது குறித்து விசாரணை நடத்தி வருகின்றனர்.

ஆண் பிணம்

திருச்சி காந்தி மார்க்கெட் பஸ் நிறுத்தம் அருகில் சுமார் 45 வயது மதிக்கத்தக்க ஆண் ஒருவர் இறந்து கிடந்தார். தகவல் அறிந்து காந்தி மார்க்கெட் போலீசார் சம்பவ இடத்திற்கு விரைந்து சென்று அங்கு இறந்து கிடந்தவரின் உடலை கைப்பற்றி பிரேத பரிசோதனைக்காக திருச்சி அரசு மருத்துவமனைக்கு அனுப்பி வைத்தனர். இது குறித்து போலீசார் தீவிர விசாரணை நடத்தி வருகின்றனர்.