தமிழ்நாட்டில் புதிதாக 542 பேருக்கு கொரோனா பாதிப்பு

சென்னை,

தமிழ்நாட்டில் கடந்த சில நாட்களாக கொரோனா பாதிப்பு படிப்படியாக அதிகரித்து வருகிறது. இதன்படி தமிழகத்தில் இன்று ஒருநாள் கொரோனா பாதிப்பு 542 ஆக அதிகரித்துள்ளது.

இதுதொடர்பாக மக்கள் நல்வாழ்வுத்துறை வெளியிட்டுள்ள செய்திக்குறிப்பில், "மாநிலத்தில் இன்று ஒரே நாளில் 542 பேர் கொரோனா தொற்றால் பாதிக்கப்பட்டுள்ளனர். இதில் 283 ஆண்கள் மற்றும் 259 பெண்கள் அடங்குவார்கள்.

அதிகபட்சமாக சென்னையில் 116 பேருக்கும்,கோவையில் 75 பேருக்கும், கன்னியாகுமரியில் 35 பேருக்கும் மற்றும் வெளிநாட்டு பயணிகள் ஒருவர் உள்பட மொத்தம் 36 மாவட்டங்களில் பாதிப்பு கண்டறியப்பட்டுள்ளது.

கொரோனா பாதிப்பில் இருந்து இன்று 432 பேர் குணம் அடைந்தனர். கொரோனா பாதிப்புடன் சிகிச்சை பெறுவோரின் எண்ணிக்கை 3 ஆயிரத்து 563 ஆக உள்ளது. இந்த நிலையில் சென்னையில் ஒருவரும் காஞ்சீபுரத்தில் ஒருவரும் கொரோனாவுக்கு பலியாகியுள்ளனர்" என்று அதில் தெரிவிக்கப்பட்டுள்ளது.