காரிமங்கலம் அருகே சரக்கு வேன்- கார் மோதல்; முதியவர் சாவு-மகன் படுகாயம்

காரிமங்கலம்:

காரிமங்கலம் அருகே சரக்கு வேன், கார் மோதிய விபத்தில் முதியவர் இறந்தார். அவருடைய மகன் படுகாயம் அடைந்தார்.

நேருக்கு நேர் மோதல்

காரிமங்கலம் அடுத்த சின்னமொரசுபட்டி கிராமத்தை சேர்ந்தவர் நஞ்சன் (வயது 65). இவருடைய மகன் வேலு (32). இவர்கள் தங்களது சரக்கு வேனில் கொட்டுமாரன அள்ளி வழியாக பாலக்கோடு நோக்கி சென்று கொண்டிருந்தனர். அப்போது கொட்டுமாரன அள்ளி பிரிவு சாலை அருகே சென்றபோது எதிரே வெங்கடேஷ் (35) என்பவர் தனது சொகுசு காரில் பாலக்கோட்டில் இருந்து பெரியாம்பட்டி நோக்கி சென்று கொண்டிருந்தார்.

அப்போது எதிர்பாராதவிதமாக சரக்கு வேனும், சொகுசு காரும் நேருக்கு நேர் மோதி கொண்டன. இந்த விபத்தில் சரக்கு வேனில் வந்த நஞ்சன் பலத்த காயம் அடைந்து சம்பவ இடத்திலேயே இறந்தார்.

விசாரணை

படுகாயம் அடைந்த வேலுவை அக்கம் பக்கத்தினர் மீட்டு ஆம்புலன்ஸ் மூலம் சிகிச்சைக்காக மருத்துவமனைக்கு அனுப்பி வைத்தனர். சொகுசு காரில் வந்த வெங்கடேஷ் லேசான காயத்துடன் உயிர் தப்பினார்.

தகவல் அறிந்து சம்பவ இடத்துக்கு சென்ற காரிமங்கலம் போலீசார் இறந்த நஞ்சனின் உடலை கைப்பற்றி பிரேத பரிசோதனைக்காக தர்மபுரி அரசு மருத்துவமனைக்கு அனுப்பி வைத்தனர். இந்த விபத்து குறித்து காரிமங்கலம் போலீசார் வழக்குப்பதிவு செய்து விசாரணை நடத்தி வருகின்றனர்.