ஈரோடு மாநகராட்சி பள்ளி மாணவ-மாணவி மாநில ஜிம்னாஸ்டிக் போட்டியில் சாதனை

தமிழ்நாடு அக்ரோபேட்டிக் ஜிம்னாஸ்டிக் மாநில சாம்பியன் கோப்பை கடந்த 1 மற்றும் 2-ந் தேதிகளில் மதுரையில் நடந்தது. இதில் ஈரோடு மாவட்டம் சார்பில் ஈரோடு எஸ்.கே.சி. ரோட்டில் உள்ள மாநகராட்சி நடுநிலைப்பள்ளிக்கூட 8-ம் வகுப்பு மாணவர் ஆர்.யோகன், 6-ம் வகுப்பு மாணவி ஆர்.நேத்ரா ஸ்ரீ ஆகியோர் பங்கேற்று விளையாடினார்கள். மாநிலம் முழுவதும் இருந்து ஜிம்னாஸ்டிக் வீரர்-வீராங்கனைகள் கலந்து கொண்ட இந்த போட்டியில் மாணவி நேத்ரா ஸ்ரீ சிறப்பாக விளையாடி ஒரு பிரிவில் முதல் இடம் பிடித்து தங்கப்பதக்கமும், இன்னொரு பிரிவில் 2-ம் இடம் பிடித்து வெள்ளிப்பதக்கமும் வென்றார். மாணவர் யோகன் 3-ம் இடம் பிடித்து வெண்கலப்பதக்கம் பெற்றார்.

இதன் மூலம் இவர்கள் 2 பேரும் அடுத்த மாதம் (நவம்பர்) இந்திய பள்ளிகள் விளையாட்டு கூட்டமைப்பு நடத்தும் தேசிய ஜிம்னாஸ்டிக் போட்டிக்கு தேர்வு பெற்று உள்ளனர்.

ஈரோடு மாவட்டத்துக்கும், பள்ளிக்கூடத்துக்கும் பெருமை சேர்ந்த மாணவர் யோகன், மாணவி நேத்ராஸ்ரீயை தலைமை ஆசிரியை கே.சுமதி மற்றும் ஆசிரியைகள் பாராட்டினர்.