பிளஸ்-1 மாணவர்களுக்கு தமிழ் மொழி இலக்கிய திறனறிவு தேர்வு

திறனறி தேர்வு

பள்ளி மாணவ, மாணவிகளின் அறிவியல், கணிதம் சார்ந்த ஒலிம்பியாட் தேர்வுகளுக்கு பெருமளவில் தயாராகி பங்கு பெறுவதை போன்று, தமிழ் மொழி இலக்கியத் திறனை மாணவர்கள் மேம்படுத்திக் கொள்ளும் வகையில் 2022-23-ம் கல்வியாண்டு முதல் தமிழ் மொழி இலக்கிய திறனறிவு தேர்வு நடத்தப்பட உள்ளது.

இந்த தேர்வில் 1,500 மாணவர்கள் தேர்ந்தெடுக்கப்பட்டு, அவர்களுக்கு பள்ளிக் கல்வித்துறை வழியாக மாதம் ரூ.1500 வீதம் 2 ஆண்டுகளுக்கு வழங்கப்படும். இத்தேர்வில் 50 சதவீத அரசுப்பள்ளி மாணவர்களும், மீதமுள்ள 50 சதவீதத்திற்கு அரசுப்பள்ளி மாணவர்கள் உள்ளிட்ட பிற தனியார் பள்ளி மாணவர்களும் தேர்வு செய்யப்படுவார்கள்.

செப்டம்பர் 9-ந் தேதி கடைசி நாள்

தமிழக அரசின் 10-ம் வகுப்பு தர நிலையில் உள்ள தமிழ் பாடத்திட்டங்களின் அடிப்படையில் கொள்குறி வகையில் தேர்வு நடத்தப்படும். அனைத்து மாவட்டங்களிலும், மாவட்ட தலைநகரங்களில் இத்தேர்வு நடத்தப்படும். 2022-23-ம் கல்வியாண்டில் தமிழகத்தில் உள்ள அங்கீகாரம் பெற்ற அனைத்து வகை பள்ளிகளில் படிக்கும் (சி.பி.எஸ்.இ., ஐ.சி.எஸ்.இ. உள்பட) பிளஸ்-1 (11-ம் வகுப்பு) மாணவர்கள், வருகிற அக்டோபர் மாதம் 1-ந் தேதி நடைபெற உள்ள இந்த தேர்விற்கு விண்ணப்பிக்கலாம்.

இந்த தேர்விற்கு மாணவர்கள் தாங்கள் படிக்கும் பள்ளியின் மூலம் மட்டுமே விண்ணப்பிக்க இயலும். எனவே மாணவர்கள் இந்த தேர்விற்கான விண்ணப்பங்களை www.dge.tn.gov.in என்ற இணையதளம் மூலம் வருகிற 22-ந் தேதி முதல் அடுத்த மாதம்(செப்டம்பர்) 9-ந் தேதி வரை பதிவிறக்கம் செய்து, பூர்த்தி செய்யப்பட்ட விண்ணப்பத்துடன் தேர்வு கட்டண தொகை ரூ.50 சேர்த்து சம்பந்தப்பட்ட பள்ளி தலைமை ஆசிரியரிடம் ஒப்படைக்க வேண்டும். பூர்த்தி செய்யப்பட்ட விண்ணப்பங்களை சமர்ப்பிக்க அடுத்த மாதம் (செப்டம்பர்) 9-ந் தேதி கடைசி நாளாகும்.

இவ்வாறு அதில் கூறப்பட்டுள்ளது.