சிறுமியை திருமணம் செய்த வாலிபர் போக்சோவில் கைது

திருச்சி எடமலைப்பட்டிபுதூர் பகுதியை சேர்ந்தவர் கவியரசன் (வயது 21). இவர் 15 வயதுடைய ஒரு சிறுமியை ஆசை வார்த்தைகள் கூறி திருமணம் செய்துள்ளார். இந்த நிலையில் அந்த சிறுமியின் பெற்றோர் இதுகுறித்து கே.கே.நகர் போலீஸ் நிலையத்தில் புகார் அளித்தனர். இந்த வழக்கு திருச்சி கண்டோன்மெண்ட் அனைத்து மகளிர் போலீஸ் நிலையத்திற்கு மாற்றப்பட்டது. போலீசார் விசாரணையில், கவியரசன் மற்றும் அந்த சிறுமி கிருஷ்ணகிரி மாவட்டம் ஓசூர் ராயக்கோட்டை பகுதியில் இருப்பது தெரியவந்தது. இதையடுத்து போலீசார் அங்கு சென்று இருவரையும் மீட்டனர். பின்னர் இதுகுறித்து கவியரசன் மீது போக்சோ சட்டத்தின் கீழ் வழக்குப்பதிவு செய்து அவரை கைது செய்து சிறையில் அடைத்தனர்.