வீட்டின் பூட்டை உடைத்து நகை-பணம் கொள்ளை

ஜோலார்பேட்டை அருகே வீட்டின் பூட்டை உடைத்து நகை-பணத்தை கொள்ளையடித்த மர்மநபர்களை போலீசார் வலைவீசி தேடி வருகின்றனர்.

ஜவுளிக்கடை ஊழியர்

திருப்பத்தூர் மாவட்டம் ஜோலார்பேட்டையை அடுத்த ஒட்டப்பட்டி பகுதியை சேர்ந்தவர் பூபதி. இவரின் மனைவி மங்கம்மா (வயது 40). இவர் திருப்பத்தூரில் உள்ள ஒரு ஜவுளிக்கடையில் ஊழியராக வேலை பார்த்து வருகிறார். கணவர் பூபதி கடந்த 5 ஆண்டுகளுக்கு முன்பு இறந்துவிட்டார். இவருக்கு சக்தி (18), காஞ்சனா (16) என்ற மகள்கள் உள்ளனர். இருவரும் நர்சிங் படித்து வருகின்றனர்.

மங்கம்மா தனது மகள்களுடன் கடந்த 30-ந்தேதி நாமக்கல்லில் உள்ள தனது உறவினர் வீட்டுக்கு சென்றுவிட்டு, வீட்டுக்கு திரும்பினார்.

போலீசார் வலைவீச்சு

வீட்டின் பூட்டு உடைக்கப்பட்டு இருந்தது. உள்ளே சென்று பார்த்தபோது, அறை கதவும் உடைக்கப்பட்டு இருந்தது. பீரோவில் வைத்திருந்த 8¼ பவுன் நகைகள், வெள்ளிக்கொலுசுகள், ரூ.5 ஆயிரத்தை மர்மநபர்கள் யாரோ கொள்ளையடித்திருப்பது தெரிய வந்தது.

இதுகுறித்து மங்கம்மா ஜோலார்பேட்டை போலீசுக்கு தகவல் தெரிவித்தார். இன்ஸ்பெக்டர் மங்கையர்கரசி மற்றும் போலீசார் சம்பவ இடத்துக்கு வந்து விசாரணை நடத்தினர். கொள்ளை சம்பவத்தில் ஈடுபட்ட மர்மநபர்களை போலீசார் வலைவீசி தேடி வருகின்றனர்.